Paqësor Buzi administrator i kompanisë G.P.G Company ishte marrë nën hetim nga Prokuroria e Tiranës për akuzën e abuzimit me TVSH, por prokuroria tha se akuzat nuk u provuan dhe kërkoi pushimin e hetimit në gjykatë.
Gjykata e Tiranës pushoi në fillim të qershorit çështjen ndaj biznesmenit Paqësor Buzi, administrator i kompanisë, G.P.G Company, i cili ishte akuzuar në shtator 2019, bashkë me një grup prej 49 personash të tjerë dhe rreth 50 kompanisë, për krijim të skemave mashtruese për tatimin mbi vlerën e shtuar dhe falsifikim të vulave dhe fshehje të të ardhurave.
Çështja ndaj Buzit, i cili është kontraktori më i madh i qeverisë në programin e “Rilindjes Urbane”, është veçuar nga të tjerat dhe prokuroria i kërkoi gjykatës në qershor që ajo të pushohej, duke arsyetuar se nuk kishte prova për asnjë nga akuzat e ngritura fillimisht ndaj biznesmenit. Prokurori i çështjes Bledar Valikaj nuk pranoi të komentonte për BIRN kërkesën për pushim.
Gjyqtari Sokol Tona i cili shqyrtoi çështjen shprehet në vendim se prokuroria kishte kryer një sërë ekspertizash në terren dhe ekspertiza kontabël nga të cilat ishte provuar se kontratat mes Buzit dhe kompanive të dyshuara fiktive “ishin të vërteta, punimet ishin kryer dhe se nuk kishte prova për fiktivitet”.
Në vendim thuhet se kompania G.P.G Company nuk kishte përfituar nga “kreditimi i TVSH-së në mënyrë fiktive” dhe se nga ekspertizat nuk kishin rezultuar veprime fiktive apo falsifikime të tij apo të kompanisë.
“Nga veprimtaria hetimore dhe aktete e ekspertimit të kryer nga organi i prokurorisë nuk rezulton të jetë provuar që subjekti G.P.G Company apo i hetuari Paqësor Buzi të kenë kryer fiktivitet veprimesh, faturash, apo punimesh”, thuhet në vendimin e gjykatës që arsyeton se nuk kishte elementë të veprave penale.
Buzi u arrestua më 5 shtator bashkë me 14 persona të tjerë, ndërsa u tha se 35 persona ishin shpallur në kërkim. Gjykata e Shkallës së Parë vendosi ndaj tij masën e sigurisë arrest shtëpie, ndërsa më pas ai u lirua nga Gjykata e Apelit. Prokuroria pretendoi atëherë se biznesmenët e ndaluar i kishin shkaktuar shtetit dëm prej 1.8 miliard lekësh.
