Komisioni i Përzgjedhjes ka konkluduar si kandidaten më të mirë për të udhëhequr Byronë Kombëtare të Hetimit për 5 vitet e ardhshme, zv.Drejtoren e Përgjithshme të Policisë së Shtetit, Aida Veizaj.
Prokuroria e Posaçme kundër Korrupsionit dhe Krimit të Organizuar, SPAK, njoftoi të hënën se për pozicionin e drejtorit të Byrosë Kombëtare të Hetimit i është rekomanduar Këshilli të Lartë të Prokurorisë, KLP emërimi i kandidates Aida Veizaj, aktualisht zv/Drejtore e Përgjithshme e Policisë së Shtetit.
Në njoftimin e SPAK thuhet se Komisioni i Përzgjedhjes së Drejtorit të BKH-së ka përfunduar procesin e identifikimit të kandidatit më të mirë për këtë pozicion.
“Komisioni i Përzgjedhjes zhvilloi dy mbledhje në datat 24.07.2020 dhe 27.07.2020, në prani dhe të Komisionit të Pavarur të Rishikimit, i përbërë nga dy përfaqësues të Bashkimit Europian dhe dy përfaqësues të Qeverisë së Shteteve të Bashkuara të Amerikës në Shqipëri”, citohet në njoftim.
Më tej shpjegohet se pasi shqyrtimit të dokumentacionit të katër kandidatëve që kishin ngelur ne garë: Artur Beu, Ervin Hodaj, Idajet Faskaj dhe Aida Veizaj, Komisioni vendosi që t’i rekomandojë KLP-së, emërimin Aida Veizaj në pozicionin Drejtorit të Byrosë Kombëtare të Hetimit, për një mandat pesëvjeçar.