Në prag të skadimit të afatit për kalimin e kufirit pa pasur me vete një test COVID-i, me mijëra emigrantë shqiptarë qëndruan sërish në radhë pavarësisht thirrjes së autoriteteve për t’u kthyer në shtëpi, ndërsa një fëmijë 10 vjeçar humbi jetën pasi u përplas nga një ambulancë.
Me mijëra persona e kaluan të shtunën në një garë rraskapitëse me kohën, në radhët kilometrike të krijuara përpara doganës së Kakavijës prej katër ditësh, pa mundur të kalojnë kufirin me Greqinë.
Situata kaotike nën diellin përvëlues të gushtit është shoqëruar me irritim dhe tension, ndërkohë që një fëmijë 10 vjeçar humbi jetën si pasojë e një aksidenti të shkaktuar nga një ambulancë.
Ambulanca po shkonte drejt vendit ku kishte ndodhur një aksident, i njohur si ura e Krasniqit, kur përplasi për vdekje 10-vjeçarin në Bularat.
Ndërsa mundësia e kalimit të doganës pa testin negativ të COVID-it është në prag skadimi, shumica e qytetarëve –emigrantë në Greqi prej vitesh, shprehen të vendosur se nuk do të kthehen mbrapsht.
“Kam gjithë jetën andej, kam krahët, punën, fëmijët. Nuk mund të kthehem, do pres!” tha për BIRN një grua në orët e pasdites.
Edhe të shtunën, radha e makinave shtrihej deri në Jorgucat të Gjirokastrës, ndërsa lëvizja mundësohej me vetëm pak metra përgjatë gjithë ditës. Pavarësisht shtimit të numrit të mjekëve nga pala greke, të cilët realizojnë testin e COVID-it për ata që ia dalin të kalojnë traun, ritmi i përpunimit nuk i kalon 10 makina në orë.
Në pritje prej 72 orësh, Nikolla Tifi – i operuar së fundmi nga një sëmundje e rëndë ka konsumuar vetëm bukë dhe ujë.
“Burri im është i sëmurë me kancer por pret si gjithë të tjerët, i mbushëm 72 orë,” thotë e shoqja.
Prej datës 16 gusht, kufirin do të mund ta kalojnë vetëm personat që kanë me vete një test negativ të COVID-19, të cilët do t’i nënshtrohen edhe një karantine 7-ditore. Megjithatë, shumica e personave në radhë nuk duket se do të mund të kalojnë përpara këtij afati.
Ministrja e Mbrojtjes, Olta Xhaçka u bërë thirrje qytetarëve të kthehen në shtëpi dhe të presin fillimin e regjimit të ri nga pala greke.
“Jemi në bisedime me palën tjetër që të shtojë ritmin dhe të kalojnë sa më shumë persona që të jetë e mundur. Por në momentin kur të mbyllet kufiri, duhet të kthehen nëpër banesa, të kenë një çati në kokë, e të mos rrinë në këtë zheg,” tha Xhaçka.
“Kanë lëvizur në një kohë të pazakontë, në një kohë kur nuk mund të sillemi si normalisht. Shteti fqinj mund të kishte vendosur ta mbyllte fare kufirin, çfarë mund të kishim bërë? Kjo kategori udhëtarësh kanë pasur mundësi të lëvizin, por janë të detyruar t’u nënshtrohen masave dhe kufizimeve, që nuk janë tonat,” shtoi ajo.
Në Kakavijë mendohet se janë mbi 15 mijë persona që presin në radhë për të kaluar kufirin, shqiptarë me pasaporta greke që jetojnë dhe punojnë në vendin fqinj. Radhët kilometrike kanë shkaktuar një krizë të vërtetë, ku është dashur ndërhyrje e autoriteteve për të ofruar ujë dhe shërbime të tjera emergjence.
Greqia ka vendosur që të mos lejojë hyrjen brenda territorit të saj të personave pa bërë testin e Covid-19, ndërsa autoritetet shqiptare u rekomandojnë njerëzve që ta kryejnë testin në Shqipëri, në klinike private dhe ta përkthejnë në anglisht, për ta pasur më të lehtë kalimin e kufirit në ditët e ardhshme.
