Prokurorët nga Gjykata Speciale në Hagë, e ngritur për të gjykuar të dyshuarit për krime të kryera gjatë dhe pas luftës në Kosovë, kanë kryer arrestimin e tyre të parë, duke ndaluar ish-oficerin e Ushtrisë Çlirimtare të Kosovës, Salih Mustafa.
Zyra e Prokurorit të Specializuar të Kosovës bëri të enjten arrestimin e saj të parë, duke ndaluar ish-oficerin e Ushtrisë Çlirimtare të Kosovës, Salih Mustafa, në rajonin e Llapit në verilindje të Kosovës, njoftoi prokuroria në Hagë.
“Salih Mustafa u arrestua sot në Kosovë nga Zyra e Prokurorit të Specializuar në bazë të një urdhër arresti, urdhri transferimi dhe aktakuze të konfirmuar, lëshuar nga një gjyqtar i procedurës paraprake të Dhomave të Specializuara të Kosovës”, tha zëdhënësi i Zyrës së Prokurorit të Specializuar Christopher Bennett.
“Zoti Mustafa po transferohet në objektin e paraburgimit të Dhomave të Specializuara të Kosovës në Hagë dhe do të dalë para gjykatësit të procedurës paraprake pa vonesa të papërligjura”, shtoi Bennett.
Detajet e akuzave kundër Mustafës, një komandant i kohës së luftës në Zonën Operative të Llapit të UÇK-së, nuk janë bërë ende publike.
Bennett tha gjithashtu që sipas ligjit të Kosovës, vetë oficerët e policisë të Zyrës së Prokurorit të Specializuar kanë “autoritetin dhe përgjegjësinë për të ushtruar kompetencat që i janë dhënë policisë së Kosovës sipas ligjeve të Kosovës” dhe mund t'i çojnë të dyshuarit e paditur në paraburgim.
Dhomat e Specializuara të Kosovës priten të gjykojnë ish-luftëtarë të UÇK-së të paditur nga Zyra e Prokurorit të Specializuar për krime të kryera gjatë dhe pas luftës nga viti 1998 deri në vitin 2000, krime që përfshijnë vrasje, torturë dhe ndalime të paligjshme.
Zyra e Prokurorit të Specializuar njoftoi në qershor se ka një aktakuzë të pakonfirmuar që akuzon presidentin e Kosovës Hashim Thaçi, si dhe politikanin e lartë të Kosovës Kadri Veseli dhe ish-luftëtarë të tjerë të UÇK-së, për krime lufte dhe krime kundër njerëzimit.
Thaçi u mor në pyetje në Hagë në mes të korrikut për katër ditë me radhë.
Arrestimi i Mustafës të enjten vjen në mes të polemikave të vazhdueshme pasi Organizata e Veteranëve të Luftës së Ushtrisë Çlirimtare të Kosovës pretendoi se ka marrë në mënyrë anonime një sasi të madhe dokumentesh të rrjedhura nga prokurorët e Hagës këtë muaj.
Organizata e Veteranëve të Luftës i ka kërkuar mediave të Kosovës që t'i botojnë ato pa zbuluar emrat e dëshmitarëve. Deri më tani, mediat në Kosovë nuk kanë publikuar asnjë nga dokumentet, por stacioni televiziv shqiptar Top Channel ka deklaruar se do ta bëjë diçka të tillë.
Dhomat e Specializuara të Kosovës dhe Zyra e Prokurorit të Specializuar janë pjesë e sistemit të drejtësisë të Kosovës, por ndodhen në Holandë dhe kanë staf ndërkombëtar.
Ato u krijuan nën presionin e madh të aleatëve perëndimorë të Kosovës, të cilët druheshin se sistemi i drejtësisë në Kosovë nuk ishte aq i fuqishëm sa të gjykonte çështje kaq të ndjeshme dhe të mbronte dëshmitarët.
