Tre të rinj janë zhdukur që prej pasdites së 3 tetorit në një fshat të Malësisë së Madhe dhe pavarësisht kërkimeve të policisë dhe banorëve nuk ka asnjë të dhënë për fatin e tyre.
Tre të rinj nga Malësia e Madhe janë zhdukur prej pasdites së të premtes, ndërsa kërkimet e policisë dhe banorëve kanë rezultuar pa fryt. Në një njoftim për shtyp të hënën policia tha se tre personat, Vilson Çutaj, 37 vjeç, nga Bajza, Klement Pepaj 21 vjeç dhe Daniel Pepaj 25 vjeç, të dy me banim në fshatin Vrith, ishin larguar nga shtëpitë të premten dhe nuk janë kthyer më.
Jo zyrtarisht policia i tha BIRN se dyshohej për një një konflikt në lidhje me parcelat të kanabisit në zonë, por se ishte e paqartë se çfarë u ka ndodhur personave të zhdukur.
Të afërmit e Klement Pepajt, ngritën dyshime për kushëririn e tij Danielin, por pa sqaruar se çfarë kishte ndodhur. Duke folur për disa media lokale, Nush Pepaj, babai i Klementit, tha se kishte dëgjuar që Çutaj kishte pasur konflikt me Daniel Pepajn dhe se të tre ishin larguar në mal dhe asnjëri nuk ishte kthyer. Ai tha se kishte dëgjuar që konflikti mund të ishte për një vajzë.
Pepaj tha se banorët kishin parë Danielin me armë dhe se kishte dyshime që i biri ishte vrarë prej tij. Pepaj tha se u kërkonte ndjesë kushërinjve nëse akuza nuk ishte e vërtetë.
Pepaj po ashtu tha se i biri nuk ishte larguar nga shtëpia për të qëndruar gjatë jashtë saj. “Doli me një bluzë pa mëngë dhe i thashë vish xhupin, por më tha nuk vonohem sa të pi një kafe”, tha Pepaj. Ai tha se kishte mësuar zhdukjen kur policia kishte ardhur të kërkonte të birin, pasi në shtëpi skishte pasur drita dhe ai kishte menduar që djali kishte shkuar të flinte.
Të afërm të dy të zhdukurve të tjerë nuk qe e mundur të kontaktoheshin. Policia tha se dy nga personat e zhdukur kishin pasur edhe më herët probleme me ligjin. Ndërsa babai i Klement Pepajt tha se ai ishte deportuar sëfundmi nga Zvicra. Raste të ngjashme zhdukjeje lidhur me kultivimin e kanabist ka pasur edhe në Vlorë në vitin 2016-2017.
