Klement Pepaj dhe Vilson Çutaj u gjetën të vrarë në fshatin Kastrat, personi i tretë që ishte zhdukur me ta Daniel Pepaj, është ende në kërkim, ndërsa të afërmit e të vrarëve kanë ngritur dyshime se ai mund të jetë autor i vrasjeve.
Trupat e pajetë të Klement Pepaj dhe Vilson Çutaj, që së bashku me Daniel Pepajn ishin zhdukur që prej 4 tetorit, u gjetën nga policia në afërsi të fshatit Kastrat në Shkodër. Policia njoftoi se ishin gjetur të vrarë Klement Pepaj 21-vjeç dhe Vilson Çutaj 37-vjeç.
Policia së bashku me familjarët i kanë gjetur trupat e pajetë mes shkurreve dhe pemëve në zonën malore të Rrencit rreth 1 orë e 30 minuta larg fshatit Vrith prej ku u zhdukën. Mësohet se të dy ishin qëllaur me armë zjarri ndërsa është shpallur në kërkim kushëriri i tyre Daniel Pepaj, 25 vjeç, që dyshohet si autor i vrasjes.
Babai i Klement Pepaj, njëri prej të vrarëve, ngriti dyshimet ndaj 25-vjeçarit, pak orë pas zhdukjes së të birit dhe Çutajt. Nush Pepaj deklaroi se 25-vjeçari ishte parë me armë para zhdukje së të birit dhe Vilson Çutajt.
Policia dyshon se konflikti lidhet me parcelat me kanabis. Në vendin ku janë gjetur 2 të rinjtë policia ka gjetur kanabis të mbjellë, por asnjë gjurmë të Daniel Pepajt, i cili është i dyshuar për vrasjen. Burime të policisë thanë se tre të rinjtë ishin grindur më herët për vjedhjen e një sasie kanabisi. Çutaj dhe Klement Pepaj akuzonin 25-vjeçarin si autorë dhe besohet se e kanë rrahur. Nga dëshmitë mendohet që të tre ishin nisur në vendin ku Daniel Pepaj kishte fshehur kanabisin.
Policia u njoftua nga Olsion Çutaj, vëllai i Vilsonit, i cili po priste në makinë të vëllain dhe dy kushërinjtë. Ndërkohë gjatë kërkimeve të kryera gjatë kësaj të enjteje, policia gjeti disa parcela me kanabis të cilat u asgjësuan duke u djegur.
