Të paktën katër njerëz u vranë dhe 120 u plagosën kur një tërmet me madhësi 6.8 ballë tronditi bregdetin e Egjeut të Turqisë, duke bërë që dhjetëra ndërtesa të shembeshin në qytetin portual të Izmirit.
Një tërmet i fuqishëm në Detin Egje shkaktoi dëme serioze në qytetin turk të Izmirit të premten dhe u ndje edhe në ishujt grekë dhe në kryeqytetin grek Athinë.
Të paktën katër njerëz u vranë dhe 120 u plagosën, ndërsa misionet e kërkim shpëtimit vazhdojnë të punojnë për të nxjerrë njerëzit e mbetur nën rrënoja, njoftoi Presidenca e Menaxhimit të Fatkeqësive dhe Emergjencave të Turqisë.
Dhjetëra ndërtesa u shembën dhe qindra të tjera u dëmtuan në Izmir. Sipas raporteve të medias, dhjetëra njerëz janë bllokuar nën rrënoja.
Operacionet e shpëtimit vazhdojnë në të gjithë qytetin.
“Njëzet ndërtesa u shembën nga tërmeti në rajonin e Bayrakli të Izmirit. Trafiku është shumë i ngarkuar dhe unë u bëj thirrje njerëzve që të lirojnë rrugët për ekipet kërkimit dhe shpëtimit. Është e vështirë të thuash për numrin e të vdekurve dhe dëmet tani për tani”, tha Tunc Soyer, kryetari i bashkisë së Izmirit.
Dogan Kalafat, kreu i Observatorit Kandilli i tha CNN turk se mund të priten paslëkundje të tjera.
“Epiqendra e tërmetit është shumë afër bregdetit dhe ndoshta ka shkaktuar një dëm serioz. Paslëkundjet do të vazhdojnë dhe njerëzit duhet të jenë të kujdesshëm”, tha Kalafat.
Kryetari i bashkisë së Buca, një nga qarqet e Izmirit të prekura nga tërmeti krahas zonave Bornova dhe Bayrakli, tha se banorët lokalë kishin dalë në rrugë në panik.
Gjithashtu u raportua se rrjeti telefonik dhe i internetit në qytet nuk po funksiononin si duhet.
Përveç dëmtimeve që tërmeti u shkaktoi ndërtesave, një valë e madhe uji nga deti përmbyti rrugët e qyteteve dhe fshatrave në zonat bregdetare.
Epiqendra e tërmetit ishte 17 kilometra larg bregdetit të Izmirit në një thellësi prej 16-17 kilometra.
Observatori Kandilli dhe Instituti për Hulumtimin e Tërmeteve thanë se tërmeti ishte me madhësi 6.8 Rihter, por Presidenca e Menaxhimit të Fatkeqësive dhe Emergjencave të Turqisë e vlerësoi atë si 6.6.
Bregu i Egjeut i Turqisë dhe Izmirit në veçanti janë zona sizmike shumë aktive dhe tërmetet e kanë goditur rajonin shumë herë.
Izmiri është një qytet portual me 4.3 milionë banorë në Turqinë perëndimore, rreth 600 kilometra nga kryeqyteti Ankara. Ai është qendra industriale dhe kulturore e rajonit të Egjeut.
