Ambasadori i Bashkimit Europian në Tiranë Luigi Soreca i bëri thirrje Kuvendit të Shqipërisë të publikojë draftin e rishikuar të projektligjit kontrovers të medias ndërsa deputetja Mirela Kumbaro duket se i hodhi poshtë kritikat duke sugjeruar se ajo vetë kishte dalë disa herë në media për të folur për këtë çështje.
Ambasadori Soreca i bëri thirrje Kuvendit të Shqipërisë të publikojë variantin e rishikuar të një projektligji kontrovers që synon të vendosë median online nën tutelën e një institucioni administrativ si dhe të hapë konsultimet me shoqërinë civile mbi këtë çështje në një fjalim që Soreca e mbajti gjatë Forumit të Gjashtë Vjetor për Zhvillimin e Medias, një aktivitet organizuar nga OSBE.
“Është koha tani që të nisë procesi i konsultimit me komunitetin e medias mbi draftamendimet e ligjit të medias dhe të merret parasysh ekspertiza e aktorëve ndërkombëtarë në mënyrë që të sigurohemi që paketa të ketë një impakt pozitiv në lirinë e shprehjes,” tha Soreca.
“Koha është shumë e përshtatshme që raporterët të prezantojnë draftin, ne po presim që ta shohim atë,” shtoi Soreca.
Projektligji që synon të vendosë një regjim kontrolli mbi median online u prezantua fillimisht nga qeveria dy vjet më parë, u ndryshua disa herë pas kritikave të ashpra nga organizatat e të drejtave të njeriut dhe u miratua në parlament mes protestave popullore në dhjetor 2019. Projektligji u bllokua kur Presidenti Ilir Meta e ktheu atë për rishqyrtim parlamentar ndërsa Asambleja Parlamentare e Këshillit të Europës kërkoi një opinion nga Komisioni i Venecias nëse ky ligj i qeverisë “Rama” ishte apo jo në përputhje me standardet ndërkombëtare. Komisioni i Venecias e cilësoi ligjin si një mjet që mund të përdoret nga oligarkët për t’i mbyllur gojën kritikëve nga media apo nga shoqëria civile.
Kryeministri Edi Rama nuk e fsheh faktin që synimi i ligjit është të mbrojë të pasurit nga media online, e cila, sipas Ramës, shantazhon biznesmenët e ndershëm.
Aktualisht projektligji ka ngecur në Komisionin Parlamentar të Medias, ku deputetja socialiste Mirela Kumbaro ka marrë përsipër të drejtojë një grup pune për rishikimin e tij. Rishikimi, gjithsesi po bëhet nën suazën e nenit 86 të rregullores së Kuvendit, e cila trajton rastet e rikthimit të ligjeve për rishqyrtim parlamentar nga ana e presidentit. Sipas këtij neni, parlamenti mund të rishikojë vetëm ato aspekte të ligjit që janë kritikuar nga presidenti.
Shoqëria civile thotë se dekreti i Presidentit Meta mbulon vetëm një pjesë të shqetësimeve të ngritura nga Opinioni i Komisionit të Venecias. Në një deklaratë për shtyp të publikuar në shtator, organizatat i bënë thirrje parlamentit që të reflektojë në tërësi opinionin e komisionit të Venecias dhe të nisë procesin nga e para. Që nga ajo kohë, deputetët socialistë të parlamentit dhe kryeministri Edi Rama kanë këmbëngulur, pavarësisht protestave vendëse dhe ndërkombëtare se do të vijojnë planin e tyre për të miratuar ligjin.
Deputetja Kumbaro nuk dha një datë se kur draftamendimet për ligjin e medias do të publikohen por tha se kjo do të ndodhë “shumë shpejt”.
Deputetja Kumbaro deklaroi se ajo e konsideron si të nevojshme “rregullimin ligjor të medias si në çdo vend demokratik” gjë që solli reagimin e Koloreto Cukallit nga Këshilli Shqiptar i medias, i cili tha se në fakt në anjë vend demokratik nuk ka rregullim të medias online ndërsa rregullimi i vetëm i pranuar është ai i medias audivizuale.