Një person është arrestuar nga policia e Shkodrës për vrasjen e Ridvan Hysenit, ndërsa 2 të tjerë u shpallën në kërkim. Policia thotë se ngjarja kishte ardhur pas një sherri të rastit mes djalit të viktimës dhe autorëve të dyshuar.
Policia e Shkodrës njoftoi të dielën se kishte arrestuar një nga autorët e dyshuar të vrasjes së ndodhur të shtunën në Dajç të Shkodrës, ndërsa janë shpallur në kërkim dy të dyshuar të tjerë. Po ashtu policia njoftoi arrestimin e dy punonjësve të karburantit që akuzohen për moskallëzim krimi.
Policia njoftoi se kishte zbardhur ngjarjen e ndodhur në fshatin Mushan, Shkodër, në afërsi të një pike karburanti, ku mbeti i vrarë me armë zjarri 46-vjeçari Ridvan Hyseni (Ramadani). Fillimish u dyshua se vrasja mund të ishte e lidhur me krime të vjetra dhe hakmarrje. Një xhaxha i Hysenit ishte vrarë në vitin 2008 dhe familja e tij kishte hasmëri. Por policia njoftoi se krimi i të shtunës lidhej me një sherr të rastit mes djalit të viktimës dhe tre autorëve të dyshuar.
“Gjatë kontrolleve të bëra nga strukturat e DVP Shkodër, FNSH Shkodër e Forcat Speciale Renea, gjatë orëve të mbrëmjes, nga shërbimet e Policisë u bë e mundur kapja dhe arrestimi i shtetasit Milkjor Gjoka, 25 vjeç, lindur dhe banues në fshatin Dajç, Shkodër, për veprën penale “Vrasja me paramendim” e kryer në bashkëpunim”, njoftoi policia.
Po ashtu policia tha se ishin shpallur në kërkim edhe dy vëllezërit Hydajet Mehmedaj 33, vjeç dhe Duel Mehmedaj, 31 vjeç. “Dyshohet se këta shtetas, në bashkëpunim me njëri-tjetrin, në afërsi të një pike karburanti, në fshatin Mushan, Shkodër, kanë varë me armë zjarri në mjetin e tij, shtetasin Ridvan Hyseni, 46 vjeç, pas një konflikti të ndodhur midis palëve disa orë para ngjarjes”, njoftoi policia.
Policia tha se në vendin e ngjarjes ishin sekuestruar një armë zjarri pistoletë, dy krehëra me fishekë pistolete, gëzhoja të armës automatike, automjeti i viktimës dhe prova të tjera.
Policia po ashtu ka arrestuar në flagrancë, për veprën penale “Moskallëzimi i krimit”, dy punonjësit e karburantit afër vendit të ngjarjes, B.Mlloja 49 vjeç dhe M.Gramshi, 49 vjeçe, të cilët kanë qenë prezent kur ka ndodhur ngjarja dhe nuk kanë njoftuar policinë për krimin e ndodhur.
Hyseni u gjet i vrarë në makinën e tij të shtunën paradite. Pranë tij policia sekuestroi 20 gëzhoja arme automatike.