Dy persona, që transportonin mina me telekomandë, u arrestuan nga policia në Lezhë, pasi ndiqeshin prej një muaji. Policia tha se eksplozivët po transportoheshin për në Malin e Zi.
Dy persona u arrestuan nga Policia e Lezhës pasi akuzohen se po trafikonin drejt Malit të Zi dy bomba me telekomandë. Operacioni policor i koduar “Distanca” u finalizua pasditen e së mërkurës dhe përfundoi me arrestimin e Erol Çiçit 33-vjeç dhe Maringlen Grudës 30-vjeç që të dy banues në Durrës dhe sipas policisë të dënuar me parë për vjedhje dhe trafikim narkotikësh.
“Këta shtetas u kapën në flagrancë në vendin e quajtur “Rrethrrotullimi i Shëngjinit”, në hyrje të qytetit të Lezhës”, njoftoi policia.
Sipas policisë në çantën e Maringlen Grudës janë gjetur dy bomba me mekanizëm shpërthimi në distancë nëpërmjet aparatit telefonik celular. “Njëra ishte me lëndë të dyshuar plasëse e llojit tritol dhe tjetra me lëndë të dyshuar si plasëse e llojit dinamit, të cilat dyshohet se do t’i trafikonin në drejtim të Malit të Zi”, njoftoi policia.
Policia e Lezhgës bëri me dije se kishte pasur më herët inofrmacion për veprimtarinë e dy të arrestuarve, që sipas saj ishin në vëzhgim prej një muaji. Policia dyshon se të ndaluarit janë vetem transportues të bombave me telekomandë dhe njoftoi se vijojnte “veprimet hetimore për identifikimin e personave të tjerë të implikuar në këtë veprimtari të paligjshme”.
Kjo është e disata herë që përsona me bomba me telekomandë kapen në zonën e Lezhës gjatë tre viteve të fundit. Në të gjitha rastet policia ka arrestuar vetëm transportuesit, ndërsa nuk ka të dhëna mbi bazën e prodhimit të bombave dhe as porositësit të cilët i blejnë kundrejt shumave të ndryshme parash.
Bombat e telekomanduara me celularë përdoren rëndon në atentate dhe për shantazh, pjesa dërrmuese e të cilave mbeten pa autorë. Vetëm në muajin e fundit policia ka identifikuar 4 raste, një në Tiranë, një në Shkodër, një në Elbasan dhe një tentativë që u zbulua para se të shpërthente në Vlorë. Atentati më i rëndë gjatë vitit të fundit ndodhi në shtator në një rrugë të populluar në kryeqytet. Atentati la të plagosur rëndë drejtuesi e mjetit në të cilin ishte vënë eksplozivi dhe një kalimtarë të rastit.