Gjykata e Lezhës caktoi masë sigurisë me burg ndaj Gjergj Gjinit, autorit të dyshuar të plagosjes së fqinjit të tij, 43-vjeçarit Hil Gjini.
Gjykata e Lezhës caktoi të premten masë sigurie me burg ndaj Gjergj Gjinit, autorit të dyshuar të plagosjes së fqinjit të tij, 43-vjeçarit Hil Gjini.
Gjatë seancës së zhvilluar me dyer të mbyllura 69-vjeçari mësohet të ketë pranuar se ka patur konflikte të vazhdueshme me Hil Gjinin, por se i kishte zënë pritë për ta trembur, pa patur qëllim që të qëllonte me armë ndaj tij.
Ndërsa avokati i 69-vjeçarit, Petrit Mhilli, kërkoi një mase më të butë ndaj klientit të tij me pretendimin se ka probleme shëndetësore me zemrën.
Por kërkesa e palës mbrojtëse nuk u mor parasysh nga gjykata e cila referuar provave të paraqitura nga prokuroria Arben Agovi e cilësoi të ligjshëm arrestimin e tij, duke vendosur masën e sigurisë arrest me burg. Avokati tha se do të apelonte masën e sigurisë në Gjykatën e Apelit në Shkodër.
Ngjarje e ndodhur mëngjesin e së martës në Balldre të Lezhës. 69-vjeçari Gjergj Gjini i zuri pritë dhe qëlloi me armë ndaj fqinjit të tij Hil Gjini, teksa ky i fundit po dërgonte fëmijet në shkollë me automjetin e tij. Prokuroria pretendoi në gjykatë se kishte qenë ndërhyrja e fëmijëve dhe bashkëshortes së 43-vjeçarit, të cilët janë përleshur dhe hequr armën nga dora autorit. Në makinë ishin edhe katër fëmijët e mitur të të plagosurit.
