Policia e Tiranës ka arrestuar 25 persona dhe ka proceduar penalisht në gjendje të lirë 130 të tjerë, të cilët morën pjesë në natën e tretë të protestës ndaj vrasjes së 25-vjeçarit Klodian Rasha nga një efektiv i patrullës së përgjithshme.
Policia e konsideron të paligjshme protestën e zhvilluar mbrëmjen e të premtes para godinës së Ministrisë së Brendshme dhe para Kryeministrisë, ndërsa shtoi se 3 punonjës të policisë kishin mbetur të plagosur nga përplasjet.
Në njoftim thuhet se pjesëmarrësit në protestën janë ndarë në disa grupe dhe për rreth katër orë kanë ushtruar dhunë në bulevardin “Dëshmorët e Kombit”, në sheshin Skënderbej, në rrugën “Myslym Shyri”, në ish-Bllok, në rrugën “Ibrahim Rrugova”, Gjin Bue Shpata”, “Sulejman Delvina” dhe “Sami Frashëri”, ndaj bizneseve private dhe disa automjete. “Gjithashtu, këto grupe kanë sulmuar me gurë e me lëndë piroteknike Drejtorinë Vendore të Policisë Tiranë”, citohet në njoftim.
Gjatë protestës së të premtes, policia i shpërndau protestuesit duke përdorur gaz lotsjellës dhe automjete ujëhedhëse, gjë që bëhet e ditur edhe në njoftim. Gjithashtu, thuhet se nga strukturat operacionale është bërë e mundur të filmohen të gjithë personat që kanë ushtruar dhunë ndaj efektivëve të policisë dhe që kanë shkatërruar pronën publike e private.
Të arrestuarit dhe të hetuarit në gjendje të lirë janë proceduar për një sërë veprash penale, të cilat lidhen me organizimin dhe pjesmarrjen në manifestime të paligjshme, kundërshtim i forcave të policisë, prishja e qetësisë publike apo shkatërrimi i pronës me zjarr.
Gjithashtu, bëhet e ditur se po punohet edhe për identifikimin dhe kapjen e protestuesve të tjerë të dyshuar për të njëjta vepra penale, si edhe për identifikimin dhe ndalimin e organizatorëve, të cilët kanë bërë dhe bëjnë thirrje në rrjetet sociale për të marrë pjesë në tubime të paligjshme.
Protesta e së premtes e çoi numrin e përgjithshëm të të arrestuarve në 84 dhe numrin e të proceduarve
Gjatë mbrëmjes së të enjtes, Policia e Shtetit njoftoi arrestimin e 59 personave dhe procedimin në gjendje të lirë 130 të tjerëve për pjesëmarrje në protestat e dhunshme që janë zhvilluar në Tiranë, Korçë dhe Lezhë, qytete ku pati përplasje të protestuesve me policinë.
