Drejtoresha e Shërbimit të Provës në Kurbin Lindita Lelçaj është ndaluar nga policia me akuzën e korrupsionit, ndërsa dyshohet se lëshonte verifikime fiktive të dënuarve në shërbim prove.
Drejtoresha e Shërbimit të Provës në Kurbin Lindita Lelçaj është ndaluar nga policia pasditen e së martës me akuzën e korrupsionit. Operacioni është kryer nga Seksioni i Krimit Ekonomik në Drejtorinë Vendore të Policisë në Lezhë, nën drejtimin e prokurorisë së Kurbinit.
Sipas prokurores së Kurbinit Ariola Preçi, e cila drejtoi hetimet, ka rezultuar se Lelçaj manipulonte provat për persona që vuanin dënimin, duke dhënë verifikime fiktive edhe për të denuar që ndodheshin jashtë vendi.
Deri në momentin e publikimit të këtij shkrimi avokatët e Lelçaj nuk qe e mundur të kontaktoheshin. Policia pretendon se Lelçaj është arrestuar në flagrancë, pasi një agjent i infiltruar i ka ofruar para në këmbim të veprime të jashtëligjshme.
Prokuroria e Kurbinit bëri me dije se vijonte hetimet në lidhje me rastin, ndërsa është sekuestruar gjithë dokumentacioni i zyrës së Shërbimit të Provës në Kurbin. Lelçaj kishte disa kohë që mbante postin e Drejtores të Zyrës së Shërbimit të Provës në Kurbin, ndërsa më herët ka punuar edhe në organet e drejtësisë në Lezhë.
