Ish-kryetarja e Bashkisë së Gjirokastrës si përfaqësuese e LSI, Zamira Rami akuzohet për prishjen e dy objekteve me leje gjatë realizimit të projekteve publike, njëra prej të cilave i përket programit të Rilindjes Urbane.
Prokuroria e Posaçme kundër Korrupsionit dhe Krimit të Organizuar, SPAK njoftoi mbrëmjen e së martës se kishte dërguar për gjykim çështjen penale në ngarkim të ish-kryetares së Bashkisë Gjirokastër, Zamira Rami, e akuzuar për “shpërdorim detyre”.
SPAK e akuzon ish-kryetaren e Bashkisë Gjirokastër se në kundërshtim me ligjin, ka kryer veprime që kanë sjellë prishjen e dy pronave private gjatë realizimit të dy projekteve, një prej të cilave në kuadër të Rilindjes Urbane.
Sipas SPAK, shkeljet janë kryer gjatë zbatimit të projektit për ‘Rikonstruksionin e rrugës Kryqëzim me rrugën nacionale (Postbllok) – Sheshi i Çerçizit' si dhe për ‘Rikualifikimin e hapësirave publike dhe rrugës hyrëse pranë Memorialit të Rilindasve në Gjirokastër.
“…ka kryer veprime në kundërshtim me aktet ligjore në fuqi, duke prishur dy prona të ligjshme të shtetasve Dritan Sako dhe Teodorti Xhai dhe duke u shkaktuar atyre një dëm pasuror në vlerë 5 600 520 lekë,” thuhet në njoftimin e SPAK.
Rami nuk iu përgjigj një kërkese për koment të BIRN deri në publikimin e këtij shkrimi.
Projekti i Rikualifikimit të hapësirave publike pranë Memorialit të Rilindasve në Gjirokastër është financuar nga Komiteti i Zhvillimit të Rajoneve në mars 2016 në kuadër të Rilindjes Urbane.
Në vitin 2019, pronarët e banesave të prishura për shkak të zbatimit të dy projekteve denoncuan Ramin në Prokurorinë e Gjirokastrës për “shpërdorim detyre”, duke pretenduar se nuk ishin dëmshpërblyer. Më pas dosja u transferua për kompetencë në SPAK.
Zamira Rami u zgjodh në krye të bashkisë Gjirokastër në vitin 2015 si përfaqësuese e Lëvizjes Socialiste për Integrim me 54.47 % të votave. Pas vendimit të opozitës për të bojkotuar zgjedhjet lokale të 2019, Rami nuk kandidoi për një mandat të dytë.
