Një 37-vjeçar që akuzohet për pengmarrjen e një të riu në Bulqizë u arrestua nga policia, por rrethanat e pengmarrjes për disa orë mbeten të paqarta.
Një person në Bulqizë është mbajtur peng për disa orë. Ngjarja ka ndodhur mbrëmjen e së mërkurës. Ylli Duriçi ka mbajtur peng në garazhin e makinës, Viktor Biçin. Sipas njoftimit të DVP Dibër, autori është arrestuar. “Specialistët për hetimin e Krimieve në Komisariatin e Policisë Bulqizë, arrestuan në flagrancë shtetasin Y. D., 37 vjeç, banues në Bulqizë. Ky shtetas për motive të dobëta i ka hequr për disa orë lirinë shtetasit V. B, 22 vjeç, banues në Bulqizë, duke e mbajtur në garazhin e makinës”, thuhet në njoftimin e policisë.
Burime të BIRN bëhet me dije se ka qenë vetë 22-vjeçari që ka bërë denoncimin, pasi kishte mundur të lirohej nga garazhi që mbahej për disa orë. Ende janë të paqarta rrethanat që kanë çuar në pengmarrjen e tij.
Materialet procedurale për rastin i kanë kaluan Prokurorisë pranë Gjykatës Rrethit Gjyqësor Dibër, për veprat penale “Heqja e paligjshme e lirisë”, dhe “Shtrëngimi me anë të kanosjes ose dhunës për dhënien e pasurisë”.