Tre persona që qëlluan me armë automatike mbi lokalin në pronësi të një oficeri të policisë dhe dy vëllezërve të tij u shpallën në kërkim, ndërsa dyshohet se motivi ka të bëjë me punën e oficerit të policisë.
Policia ka identifikuar dhe shpallur në kërkim autorët e dyshuar të ngjarjes së ndodhur të martën në mbrëmje në fshatin Dobraç, të cilët qëlluan me armë zjarri në drejtim të lokalit të një punonjësi të policisë.
Në njoftimin zyrtar të policisë thuhet se “janë identifikuar dhe u shpallën në kërkim shtetasit:R. P., O. P., B. P. dhe M. Sh”. “Shpallja në kërkim e këtyre shtetasve u bë pasi mbrëmjen e djeshme dyshohet se kanë qëlluar me armë zjarri në drejtim të lokalit të shtetasit A. P., banues në fshatin Dobraç, Shkodër”, njoftoi policia.
Ngjarja ndodhi rreth orës 21.00 të së martës, pranë stacionit të pompave në Dobraç. Personat e shpallur në kërkim dyshohet se qëlluan me breshëri ndaj lokalit të Alfred Pjetrit, i cili është efektiv i policisë në repartin “Shqiponja”. Në vendin e ngjarjes janë gjetur mbi 30 gëzhoja fishekësh, por dëmet ishin vetëm materiale. Lokali menaxhohet nga dy vëllezërit e tij, Vlash Pjetri, ish-administrator i njësisë administrative Rrethina dhe Nikollë Pjetri. Vëllezërit pretenduan se nuk kishin probleme dhe se lokali ishte sulmuar në kohën kur ishte i mbyllur.
Policia i përqendroi hetimet e sulmit me armë tek detyra së efektivit Albert Pjetri, i cili është edhe pronar i lokalit, gjë që sipas tyre çoi te autorët e mundshëm. Mësohet se para pak ditësh efektivi Alfred Pjetri, ndërsa ishte në shërbim kishte ndaluar shtetasin R.P, i shpallur në kërkim. Ky e ka kundrështuar punonjësin e policisë dhe ka debatuar me të, ndërsa patrulla “Shqiponja” e ka shoqëruar në polici. Pas kryerjes së veprimeve R.P është lënë i lirë ndërsa mjeti është mbajtur për verifikim. Ky mendohet të jetë edhe motivi pas ngjarjes.
