Dy persona u arrestuan nga policia në Durrës pasi u kapën me 18 kilogramë eksploziv që dyshohet se do e shisnin për 12 mijë euro.
Policia e Durrësit ndaloi të martën 2 persona që sipas saj po transportonin nga Kukësi në drejtim të Durrësit 29 kallëpe me lëndë eksplozive tritol që peshonin 18 kilogramë dhe 15 kapsolla detonatorë.
Gjatë operacionit të koduar “Trajektorja” policia tha se ndaloi, një 42 vjeçar me iniciale B. B. dhe një 31 vjeçar me iniciale Sh. T., të dy banues në Kukës.
“Shërbimet e Policisë, pas informacionit të siguruar se në drejtim të Durrësit po lëvizte një automjet me 2 persona, të cilët kishin vendosur në bagazh një sasi të konsiderueshme lënde eksplozive, menjëherë kanë organizuar punën dhe në Sukth kanë ndaluar mjetin me të cilin po lëviznin shtetasit B. B. dhe Sh. T.”, njoftoi Policia e Durrësit.
Sipas deklaratës për shtyp ata “do ta shisnin lëndën shpërthyese dhe materialet plasëse kundrejt vlerës 12 mijë euro”.
Po në Sukth policia një muaj më parë zhvilloi operacionin e koduar “Mbikalimi” dhe sekuestroi gjatë kontrollit fizik të shtetasit me iniciale N. K., 16 kallëpe tritol dhe 10 kapsolla detonatorë, të cilat sipas policisë ai do i shiste kundrejt fitimit. 47 vjeçari ishte gjithashtu nga Kukësi, por banues në Tiranë. Pas ndalimit të tij Policia e Kukësit zhvilloi kontroll në banesë i gjeti 1 armë zjarri, 3.5 kg kallëp tritol, 20 granata ofensive dhe 20 ndezësa.
Ndërkohë më 23 dhjetor Policia e Durrësit ndaloi një 29 vjeçar i cili kishte në posedim 2 mina të lidhura me aparate celularë për shpërthim në distancë, ndërsa Policia e Lezhës më herët arrestoi 2 persona nga Durrësi për posedim të dy minave me telekomandë që dyshohet se po i trafikonin për në Malin e Zi.
Sulmet me eksploziv në Shqipëri janë përdorur dendur vitet e fundit për shantazhe apo eliminime fizike. Pak minuta pas mesnatës së 19 nëntorit, një sasi lënde plasëse shpërtheu në një objekt turistik në ndërtimi në zonën e Ranës së Hedhun në Shëngjin.
