Greqia dhe Shqipëria firmosën në Kakavijë hapjen e një qendre të përbashkët policore për të luftuar krimin ndërkufitar. Qendra është e vendosur në anën greke të kufirit dhe do të ketë specialistë nga të dy vendet.
Shqipëria dhe Greqia nënshkruan të hënën një marrëveshje për funksionimin e një qendre të përbashkët policore dhe doganore për të luftuar krimin ndërkufitar, përfshi trafikun e narkotikëve. Marrëveshja e për hapjen e qendrës u nënshkrua nga Zv-Ministri i Brendshëm shqiptar Julian Hodaj dhe homologu grek Lefteris Ikonomu dhe parashikon vendosjen e një trupe të përbashkët policore dhe doganore në mjediset e qendrës në anë greke të kufirit.
Marrëveshja e përbashkët parashikon bashkëpunimin policor dhe doganor dhe shkëmbim të informacioneve që lidhen me forma të ndryshme të krimit në kufijtë e të dy vendeve.
Sipas marrëveshjes në fushat e bashkëpunimit dhe autoriteti veprues të qendrës përfshihet bashkëpunimi për të goditur transportin dhe trafikimin e lëndëve narkotike apo armëve, bashkëpunimi për parandalimin e ekstremizmit të dhunshëm dhe rekrutimit të luftëtarëve të huaj, luftimi migracionit të paligjshëm, zbulimi dhe goditja e autorëve të shkeljeve që lidhe me procedurat doganore dhe kufitare.
Zv-Ministri i Brendshëm shqiptar Julian Hodaj tha se ky ishte vetëm fillimi i disa inciativave për të “thelluar bashkëpunimin shqiptaro grek”.
Ndërsa zv.Ministri grek i Rendit Lefteris Ikonomu tha se “Qendra do të vepronte 24 orë në 365 ditë të vitit me personel të përbashkët dhe ishte shprehje e vullnetit të dy vendeve për të luftuar krimin”. Qendra pritet të nisë aktivitetin pas një muaji dhe është iniciativë e Greqisë e cila ka hapur të tilla edhe me Bullgarinë dhe Turqinë.
