Një hetim i SPAK solli arrestimin e gjyqtares Enkeleida Hoxha të Krujës, të disa zyrtarëve të kësaj gjykate si dhe të një avokati e disa qytetarëve. Nën akuzë janë edhe një mjek psikiatër dhe një mjek kardiolog të dyshuar se kanë lëshuar ekspertime mjekësore të pavërteta për të burgosur të burgut të sigurisë së lartë në Fushë-Krujë.
Trembëdhjetë persona, përfshirë një gjyqtare dhe dy mjekë u vunë nën akuzë nga Prokuroria e Posaçme Kundër Korrupsionit dhe Krimit të Organizuar, u akuzuan të enjten si pjesë e një strukture kriminale që synonte të lironin disa të burgosur të burgut të sigurisë së lartë në Fushë-Krujë përkundrejt përfitimeve monetare.
“Falë hetimeve të këtij procedimi u bë e mundur të evidentohej një skemë e mirëfilltë kriminale sipas së cilës persona të dënuar që cilët vuanin dënimin në burgun e Fushë – Krujës përfitonin ulje dënimi kundrejt dhënies së përfitimit të parregullt,” bëhet e ditur në njoftimin e SPAK.
“Të dënuarit kujdeseshin fillimisht që si mbrojtës të tyre të zgjidhnin avokatin Aldo Tabaku dhe ky i fundit falë marrëdhënies që kishte krijuar me gjyqtaren Enkeleda Hoxha, mundësonte që të dënuarit të përfitonin uljen e dënimit, kundrejt shumave të parave të dhëna si përfitim i parregullt. Hetimi ka provuar se gjithë kjo bëhej kundrejt përfitimit të parregullt të shumave të konsiderueshme në Euro, që shkonin nga 6 deri 12 000 euro,” vijon më tej SPAK.
Gjyqtarja Enkeleida Hoxha, e cila është sakaq nën hetim administrativ nga Inspektori i Lartë i Drejtësisë për shkak se ka lehtësuar lirimin nga burgu të disa të dënuarve të profilit të lartë, përfshirë Endrit Doklen, Ilir Pajën dhe Hekuran Billën, u shpall e arrestuar me masë sigurie të Gjykatës së Posaçme të Shkallës së Parë Për Korrupsionin dhe Krimin e Organizuar.
Sekretarja e Gjykatës së Krujës Manuela Mallakuçi akuzohet njëkohësisht për korrupsion pasiv dhe aktiv ndërsa mjeku psikiatër ligjor Shkëlqim Korbi akuzohet për “ekspertim të rremë”. Ajo dyshohet se ka organizuar punën që, përkundrejt një përfitimi të paligjshëm, të sigurohej që kërkesa e një të dënuari t’i kalonte si çështje gjyqtares Enkeleida Hoxha.
Sajmir Petani, Bledar Petani dhe Altin Skëndaj akuzohen për korrupsion aktiv të gjyqtarëve ndërsa Gazmir Nezaj, Gentjan Nezaj dhe Isuf Tanuzi akuzohen Ushtrimi i ndikimit të paligjshëm ndaj personave që ushtrojnë funksione publike.
Me kërkesë të SPAK, gjykata vendosi edhe pezullimin nga detyra të mjekut kardiolog Edvin Prifti i dyshuar për korrupsion pasiv si dhe një infermiere e një qytetare të dyshuar për ushtrim të ndikimit të paligjshëm.
Mjeku psikiatër Shkëlqim Korbi u arrestua pasi u gjet duke ndryshuar një akt ekspertimi pas ndërhyrjes së të burgosurit që kishte kërkuar revokim të masës mjekësore “mjekim i detyruar spitalor”.
Lexo më shumë:
Lirimet nga burgu, ILD kërkon shkarkimin e gjyqtares Enkeleda Hoxha
I dënuar me burgim të përjetshëm, Gjykata e Krujës liron Endrit Doklen
Fluks uljesh dhe amnisti: Skema e lirimit nga burgu të Endrit Dokle
Uljet e dënimit dhe vendimet me pasaktësi hapën rrugën për lirimin e Ilir Pajës
