Armatori i një kompanie minerare në zonën D në Bulqizë u arrestua nga policia, pasi një ditë më parë një minatorë humbi jetën poshtë një masivi gurësh në galeri. Brigadieri i kompanisë është po ashtu në hetim.
Armatori i një kompanie minerare në zonën D në Bulqizë u arrestua nga policia të enjten, pasi një ditë më parë një minatorë humbi jetën poshtë një masivi gurësh në galeri. Ndërkohë ka filluar edhe procedimi penal ndaj brigadierit të kompanisë.
Policia e Dibrës njoftoi se ishte arrestuar armatori i subjektit minerar “KACI – IF – 2012” shpk, si dhe është proceduar penalisht brigadieri i subjektit. “U arrestua Ç. D, 61 vjeç, banues në Bulqizë, (me detyrë armator në një subjekt minerar në zonën D), si dhe filloi procedimi penal në gjendje të lirë për shtetasin F. K., 50 vjeç, banues në Bulqizë, (me detyrë brigadier), për veprën penale “Shkelja e rregullave të mbrojtjes në punë”, thuhet në deklaratën e policisë. Kompania nuk qe e arritshme për koment.
Të mërkurën pas shembjes së një masivi gurësh në këtë galeri mbeti i vrarë minatori Fiqiri Karaj, baba i katër fëmijëve.
Sipas policisë personat e mësipër kanë pasur si detyrim ligjor kontrollin e vazhdueshëm të gjendjes teknike të galerisë. “Si pasojë e neglizhencës së tyre, mesditën e datës 24.02.2021, në një nga nënkatet e subjektit minerar, është shembur një pjesë armature duke i shkaktuar vdekjen një 49-vjeçari (me detyrë vagonist)”, thuhet në njoftim.
Materialet për aksidentin i kaluan Prokurorisë pranë Gjykatës së Shkallës së Parë Dibër për veprime të mëtejshme.
Zona D ku ndodhi aksidenti, është cilësuar në vazhdimësi nga specialistët e minierës si më e pasigurta dhe me numrin më të lartë të aksidenteve të ndodhura në minierën e Bulqizës.
Bilancit tragjik të aksidenteve në miniera iu shtuan pesë të vdekur dhe 28 të plagosur gjatë vitit 2020. Ndërkohë qarku i Dibrës, ku ndodhet miniera e Bulqizës, mban vendin e dytë për numrin e lartë të aksidenteve dhe të fataliteteve në vendin e punës pas Tiranës.