Një minator, 51 vjeç, pësoi fraktura në këmbë gjatë punës në galeritë e kromit në Bulqizë dhe u përcoll për ndihmë në spitalin e Traumës në Tiranë. Kompania Albchrome tha se aksidenti ishte për “pakujdesinë e punonjësit”.
Një minator u plagos të hënën në galeritë e menaxhuara nga Albchrome në minierën e Bulqizës. Policia e Dibrës njoftoi se ngjarja ndodhi rreth orës 12.40 dhe se “A.GJ, ishte plagosur gjatë punës”.
Një burim nga spitali i Bulqizës i tha BIRN se i plagosuri kishte dëmtime në këmbë, thyerje të kockave dhe është dërguar drejt spitalit të Traumës në Tiranë për ndihmë më të specializuar, por është jashtë rrezikut për jetën.
Sindikata e Minatorëve të Bashkuar të Bulqizës e identifikoi minatorin si Agron Gjeta dhe tha se ai ishte aksidentuar gjatë punës në sektorin e transportit të brendshëm. “Kërkojmë hetim serioz të aksidentit dhe kushteve të sigurisë teknike. Ky aksident i ndodhur në minierën e Albchrome, nuk është rast i rrallë, as i veçuar”, thuhet në reagimin e SMBB.
Kompania AlbChrome –pjesë e grupit Balfin, që është koncensionari më i madh në zonën e Bulqizës, fajësoi për pakujdesi minatorin e aksidentuar. “Në turnin e parë të punës në nivelin e 17-të të minierës të administruar nga AlbChrome në Bulqizë, gjatë procesit të lëvizjes së vagonëve, për shkak të pakujdesisë së punonjësit A. Gj, 51 vjeç, me profesion manovrues vagonësh (ndihmës elektrovozist), ky i fundit pësoi një lëndim të lehtë”, thuhet në reagimin e Albchrome. Kompania Albchrome the se minatori i lënduar ka “frakturë të lehtë të pjesës së sipërme të këmbës së djathtë”.
Ky është aksidenti i pestë në dy muajt e parë të këtij viti në galeritë e Albchrome, ndërkohë që vetëm tre aksidente ishin raportuar gjatë gjithë vitit 2020.
SMBB akuzon kompaninë se ndërsa ka investuar për rritje të prodhimit, ka përkeqësuar kushtet e sigurisë. “Përkundrazi, rritja e prodhimit është rrezik i shtuar për punëtorët dhe koha po e tregon”, thuhet në deklaratën e SMBB.
Kushtet e sigurisë në galeritë e nxjerrjes së kromit në Bulqizë, janë problematike prej vitesh, ndërsa zona ka numrin e dytë në vend pas Tiranës për numrin e të vrarëve në aksidente në punë.
Pesë të vdekur dhe 28 të plagosur u raportuan gjatë vitit 2020 vetëm në minierat e kësaj zonë. Ndërkohë në fillim të vitit 2021 një person humbi jetën në galeritë e kontrolluara nga kompania “KACI – IF – 2012” shpk.
