Gjykata e Kurbinit shpalli fajtor dhe dënoi me burgim të përjetshëm 27-vjeçarin Markel Bushi, si autor i vrasjes së dy kushërinjve në vitin 2019. Mbrojtësit e Bushit paralajmëruan se vendimi do të apelohej.
Gjykata e Kurbinit shpalli fajtor dhe dënoi me burgim të përjetshëm 27-vjeçarin Markel Bushi, si autor i vrasjes së dy kushërinjve në muajin prill të vitit 2019-të në qytetin e Laçit.
Trupa gjykuese pranoi kërkesën e prokurorisë e cila kërkoi burgim të përjetshëm për Bushin, për veprat penale “Vrasja me paramendim” dhe “Armëmbajtja pa leje”.
Nga ana tjetër, avokati dhe familjarët e të pandehurit, pretenduan se vrasja e dy kushërinjve Erion dhe Kelvin Jushi, ishte në kushtet të vetëmbrojtjes pas kërcënimit të tyre për ta vrarë. Për ngjarjen e vitit 2019, vetë i akuzuari ka pranuar autorësinë e krimit, duke u shprehur i penduar, teksa ka deklaruar se kishte qëlluar në kushtet e vetëmbrojtjes. Pretendimet e tij nuk u morën në konsideratë nga gjykata.
Vrasja ndodhi në 28 prill 2019-të, në Laç. Dy kushërinjtë Erion dhe Kelvin Jushi u ekzekutuan me breshëri plumbash, pasi më herët kishin pasur një konflikt me vëllain e autorit. Dy bashkëpunëtorët e tij në këtë krim Manuel Bushi dhe Vincesk Bushi, janë hetuar dhe gjykuar veçmas, dhe janë dënuar për akuzën e “Moskallëzimit të krimit” dhe “Përkrahje e autorit të krimit”. Personat përfshire në këtë krim të dyfishtë u arrestuan nga policia disa ditë pas ngjarjes. Markel Bushi i cili është dënuar me burgim të përjetshëm si autor i vrasjes së dyfishtë është person me precedent të mëparshëm penal. Mbrojtësit e tij paralajmëruan se do të apelonin vendimin.
