Ish-luftëtarë shqiptaro-amerikanë nga lufta në Kosovë në vitet 1998-1999 i bënë thirrje presidentit Joe Biden që të ndërhyjë për ta zhvendosur gjykatën e krimeve të luftës, që do të gjykojë ish-guerilët shqiptarë etnikë, nga Haga në Kosovë.
Shoqata Atlantike, një organizatë që përfaqëson shqiptaro-amerikanët që e përshkruajnë veten si “ish-ushtarë krenarë të UÇK-së, i dërgoi të mërkurën një letër presidentit të SHBA-së Joe Biden duke i kërkuar që të ndërhynte për ta zhvendosur në Kosovë gjykatën e krimeve të luftës Dhomat e Specializuara të Kosovës me qendër në Hagë”.
“Kosova është një vend sovran dhe duhet ta administrojë vetë drejtësinë dhe sistemin e saj gjyqësor”, thuhej në letër.
Dhomat e Specializuara të Kosovës, të cilat do të gjykojnë ish-luftëtarë të UÇK-së për krime lufte dhe paslufte të kryera midis vitit 1998 dhe 2000, janë pjesë e sistemit të drejtësisë së Kosovës, por ndodhen në Holandë dhe përbëhen nga staf ndërkombëtar.
Ato u ngritën në Hagë, nën presionin e mbështetësve të Kosovës në SHBA dhe BE, në një përpjekje për të parandaluar ndërhyrjen te dëshmitarët që ka dëmtuar gjykimin e mëparshëm të ish-guerileve të UÇK-së.
E ashtuquajtura “Gjykata Speciale” nuk shihet me sy të mirë nga shqiptarët e Kosovës, të cilët e shohin atë si një përpjekje për të njollosur luftën e UÇK-së për çlirim nga sundimi serb.
Ajo u bë edhe më e diskutueshme kur ish-presidenti Hashim Thaçi dhe ish-kryetari i parlamentit Kadri Veseli, të dy figura të larta të UÇK-së gjatë luftës, u arrestuan dhe u dërguan në Hagë vitin e kaluar për t’u përballur me akuzat.
Presidentja e Dhomave të Specializuara të Kosovës, Ekaterina Trendafilova, paralajmëroi në shkurt se përpjekjet e politikanëve të Kosovës për ta zhvendosur gjykatën nga Holanda në Prishtinë, ose për të falur këdo të dënuar prej saj, mund të ndikojnë në sigurinë e dëshmitarëve.
“Kjo sigurisht që do të vërë në rrezik jetën dhe sigurinë e njerëzve që kanë bashkëpunuar ose do të jenë të gatshëm të bashkëpunojnë me ne. Ndryshime të tilla, sigurisht që do të kishin një efekt tronditës mbi dëshmitarët, të cilët mund të mos dëshirojnë më të paraqiten në gjykatë”, u tha Trendafilova diplomatëve evropianë.
Letra e Shoqatës Atlantike, e cila u shkrua për të përkuar me përvjetorin e fillimit të fushatës ushtarake të NATO-s kundër Jugosllavisë për t’i dhënë fund luftës së Kosovës në 1999, tha se “agresorët në Kosovë ishin Serbia dhe Jugosllavia”.
Ajo argumentoi se Dhomat e Specializuara të Kosovës janë të njëanshme sepse ato nuk do të gjykojnë serbë që “kryen krimet më çnjerëzore” dhe pretendoi se gjykata me bazë në Hagë “nuk po kërkon drejtësi, por rishikim të historisë”.
Duke i bërë thirrje Biden-it, letra risolli në kujtesë se si presidenti i SHBA-së dikur e quajti Thaçin, ish-udhëheqësin politik të UÇK-së i cili aktualisht është në paraburgim në pritje të gjykimit për krime lufte dhe krime kundër njerëzimit, “Xhporxh Uashingtonin e Kosovës”.
Thaçi dhe të bashkë-akuzuarit e tij janë vetëdeklaruar të pafajshëm.
