Një oficer policie dyshohet se qëlloi aksidentalisht në këmbë dy kolegë të tij dhe një qytetar, ndërsa patrulla e policisë ishte në përpjekje të ndalonte për kontroll një automjet, dhe ishte grindur me shoferin e pasagjerët.
Tre persona mes të cilëve dy efektivë policie mbetën të plagosur në Mamurras të Kurbinit. Ngjarja ndodhi rreth orës 14:00 të së martës në qendër të qytetit, ndërsa të plagosurit janë efektivët e policisë Flamur Lleja dhe Ilir Zekaj dhe qytetari Nikoll Vorfi.
Të dhënat paraprake të bëra publike nga policia për ngjarjen përshkruajnë një konflikt mes tre personave me një patrulle të policisë po ashtu me tre efektivë.
Policia thotë se patrulla ndaloi një automjet në të cilin udhëtonte Vorfi dhe dy persona të tjerë për të ushtruar kontroll. Personat në mjet kanë refuzuar të binden dhe janë grindur me fjalë me oficerët e policisë.
Dyshohet se një nga oficerët e policisë ka përdorur më pas armën e shërbimit duke qëlluar. Nga plumbat janë plagosur dy kolegët e tij dhe Vorfi. Të tre ndodhen në Spitalin e Traumës me plagë të marra në këmbë, pa rrezik për jetën.
Sipas policisë së Lezhës për të hetuar ngjarjen është ngritur menjëherë një grup i posaçëm hetimor, i përbërë nga Specialistë të Hetimit në Shërbimin për Çështjet e Brendshme dhe Ankesat në Ministrinë e Brendshme dhe Specialistë të Hetimit në Drejtorinë Vendore të Policisë Lezhë dhe nën drejtimin e drejtuesit të Prokurorisë së Kurbinit.
Policia tha se kishte shoqëruar disa persona, por nuk kishte asnjë të ndaluar për ngjarjen.
