Gjykata e Rrethit Gjyqësor në Dibër pranoi të shtunën kërkesën e prokurorisë pranë kësaj gjykate për caktimin e masës së sigurisë “arrest në burg” për dy të arrestuarit e datës 22 prill në Maqellarë.
Denis Xholi me detyrë jurist i Bashkisë Bulqizë dhe Abjon Ceku, i cili e shoqëronte atë u ndaluan nga mbështetës të Partisë Demokratike me dyshimet se do të blinin vota. Në makinën me të cilën udhëtonin u gjetën 500 mijë lekë, fletëpalosje dhe lista me emra votuesish.
Prokuroria e Rrethit Gjyqësor në Dibër ngriti ndaj tyre akuza për veprat penale: “Korrupsioni aktiv në zgjedhje” kryer në bashkëpunim dhe “Përdorimi i funksionit publik për veprimtari politike ose zgjedhore”.
Gjykata pranoi kërkesën e prokurorisë, duke lënë me masë sigurie arresti me burg të dy personat e arrestuar.
Avokati mbrojtës Halil Zhuka, tha për mediat se nuk kishte prova që personat e arrestuar të kenë kryer këtë vepër penale dhe cilësoi të padrejtë masën. “Personat në hetim deklaruan se nuk e kanë kryer veprën penale që akuzohen sepse janë kapur në makinë, nuk kanë qenë në kryerje e sipër dhe as ka prova që i implikojnë për veprën penale.” tha avokati.
Mbështetësit e PD bllokuan makinën për afro një orë, deri në mbërritjen e policisë dhe prokurorit, që më pas ka bërë shoqërimin e personave që ndodheshin brenda saj. PD akuzoi dy të ndaluarit se do blinin vota për kandidatin e Partisë Socialiste Melaim Damzi, broshurat e të cilit u gjetën në makinë.
Në një deklaratë për mediat Partia Socialiste e Dibrës, mohoi akuzat, ndërsa pretendoi se blerësit e dyshuar nuk ishin aktivistë të saj, por të LSI. Ndërkohë mësohet se drejtuesi juridik në Bashkinë Bulqizë, Denis Xholi është pezulluar nga puna “derisa drejtësia të japë fjalën e saj”.
Ndërkohë të shtunën policia njoftoi procedimin penal për 5 mbështetës të Partisë Demokratike që kanë bllokuar dhe ushtruar kontroll në makinën e një punonjëse të Postës së Shqipërisë. Mbështetësit e PD-së pretenduan se punonjësja kishte para për të blerë vota, por në makinë nuk është gjetur asnjë material i dyshimtë. Punonjësja e postës kallëzoi në polici postobllokun.
