Gjykata e Lezhës la në burg një oficer policie i cili akuzohet se ngacmoi seksualisht një 13-vjeçare. Oficeri ka mohuar akuzat dhe pretendon se i është ngritur kurth.
Gjykata e Lezhës ka lënë në burg efektivin e policisë Kol Kola i cili u arrestua të martën, pasi dyshohet se ka ngacmuar seksualisht një të mitur 13-vjeçare. Në seancën gjyqësore të zhvilluar me dyer të mbyllura, 62-vjeçari mësohet të ketë thënë se ngjarja është e inskenuar dhe se nuk e ka ngacmuar të miturën.
Po pavarësisht pretendimeve të policit, referuar provave të paraqitura nga prokurori Arben Agovi, gjyqtarja Elsa Ulliri e cilësoi të ligjshëm arrestimin e policit dhe vendosi masën e sigurisë “Arrest me burg” për veprën penale “Ngacmim seksual”.
Në seancën gjyqësore për caktimin e mases së sigurisë jashtë ambienteve të gjykatës nuk ishte i pranishëm asnjë familjar i policit, ndërsa gjatë hyrjes dhe daljes në gjykatë 62-vjeçari mbante një kapuç në kokë dhe maskë.
Kol Kola me detyrë Ndihmës Specialist i Policimit në Komunitet pranë Komisariatit të Policisë Lezhë u arrestuar nga shërbimi për Çështjet e Brendshme dhe Ankesat (SHÇBA), pas urdhër ndalimit që kishte vendosur prokuroria. Ndalimi i 62-vjeçarit u krye pasi dyshohet se në datë 29 prill 2021, ka tentuar të kryejë marrëdhënie seksuale me një të mitur të moshës 13-vjeçare.
Nga hetimi i deritanishëm ka rezultuar se “punonjësi i policisë Kol Kola ka shfrytëzuar rastin që e mitura ka qenë e pashoqëruar nga persona madhorë, e duke keqpërdorur atributet që i jep detyra funksionale, nëpërmjet mashtrimit se do ta shoqëronte në Komisariatin e Policisë, e ka marrë të miturën në një banesë në qytetin e Lezhës, që e kishte në përdorim”.
Aty dyshohet se ka kryer vepra të turpshme, duke tentuar gjithashtu të kryejë marrëdhënie seksuale. Këto veprime janë kundërshtuar nga e mitura, e cila u largua me forcë nga banesa dhe menjëherë ka bërë kallëzim, duke rrëfyer atë çfarë i kishte ndodhur. Nisur nga kallëzimi i të miturës dhe nga verifikimet paraprake të Policisë Gjyqësore, që dokumentoi me prova shkencore rastin, si edhe duke siguruar pamje filmike, është arritur në konkluzionin se efektivi i policisë Kol Kola ka konsumuar elementë të veprës penale “Ngacmim seksual”.
I dyshuari ka pranuar faktin se e ka marrë 13-vjeçaren në makinë, por pretendoi se ajo i kishte kërkuar ndihmë për ta çuar tek një banesë në Lezhë. Kol Kola është pjesë e strukturave të policisë së shtetit prej shumë vitesh, duke shërbyer në disa zona të Qarkut të Lezhës.