Pasi një masiv guri plagosi një minatorë të premten, policia njoftoi nisjen e ndjekjes penale ndaj njërit prej drejtuesve teknik të minierës së kontrolluar nga Albchrome, pasi nuk ishte bërë kontrolli i frontit të punës. Kompania e minimizoi ngjarjen duke e cilësuar plagosjen “krisje gishti”.
Policia e Dibrës njoftoi të shtunën se kishte filluar procedim penal ndaj tekniku të kompanisë Albchrome në minierën e Bulqizës, pas një aksidenti në të cilin mbeti i plagosur një punëtor.
Policia njoftoi se personi i proceduar penalisht, i identifikuar si N.Gj, kishte për detyrë kontrollin e gjendjes teknike të frontit të punës dhe ka neglizhuar punën. Kjo sipas policisë ka sjell shembje të një pjesë minerali, e cila ka plagosur minatorin Hysen Rrahmani, 32 vjeç.
“Procedimi penal ndaj tij filloi pasi ky shtetas nuk ka bërë kontrollin teknik të frontit të punës sipas rregullores, dhe për pasojë gjatë punës në galeri është shembur një copë minerali dhe ka mbetur i lënduar shtetasi H. R., 32 vjeç,(punëtor), i cili ndodhet për mjekim në spital, jashtë rezikut për jetën”, thuhet në njoftimin e DVP Dibër.
Kompania AlbChrome, në galeritë e kontrolluara prej të cilës ndodhi aksidenti, u përpoq ta minimizonte atë të premten. Në një deklaratë për mediat pas aksidentit, kompania tha se minatori kishte krisje të një gishti të dorës dhe se për mungesë energjie në Spitalin e Bulqizës, ishte nisur për mjekim në një spital tjetër.
Një burim nga spitali i Bulqizës i tha BIRN se i plagosuri kishte dëmtuar tendinën e dorës dhe kishte gërvishtje në këmbë. Minatori i plagosur është dërguar nga spitali i Bulqizës drejt spitalit të Traumës në Tiranë për ndihmë më të specializuar mjekësore.
Në një deklaratë për shtyp, Sindikata e Minatorëve të Bashkuar të Bulqizës deklaroi se rritja e normës së punës është burimi kryesor i dëmtimeve në miniera.
“Pas shpërthimit në galeritë e Martaneshit tre ditë më parë, një tjetër minator aksidentohet brenda galerive të kompanisë Albchrome. Hysen Rrahmani, 32 vjeç, sipas dëshmive të shokëve të tij në punë ka pësuar dëmtime në pjesën e dorës dhe të këmbës dhe është dërguar me urgjencë në Spitalin e Traumës në Tiranë”, deklaron SMBB.
Ky është aksidenti i shtatë i raportuar në pesë muajt e parë të këtij viti në galeritë e Albchrome, ndërkohë që vetëm tre aksidente ishin raportuar gjatë gjithë vitit 2020.
Pak ditë më parë në zonën krom-mbajtëse të Martaneshit, mbetën të asfiksuar tre minatorë, pasi një punëtor po saldonte me gjenerator brenda galerisë.