Viktima Endri Mustafa, 32 vjeç ishte zhdukur prej tre ditësh. Ai u gjet i vrarë buzë Liqenit të Shkodrës, ndërsa dyshohet se është viktima e rradhës e luftës mes grupeve të ndryshme kriminale në Shkodër.
Një 32-vjeçar u gjet i vrarëtë hënën buzë Liqenit të Shkodrës. Viktima Endri Mustafa ishte zhdukur prej tre ditësh dhe të afërm të tij kishin denoncuar zhdukjen pa gjurmë.
“Më datë 17.05.2021, në orën 09:00, në bregun e liqenit, në livadhe, në lagjen Guerile, Shkodër është gjetur i pajetë shtetasi E. M., 32 vjeç, dyshohet i vrarë me armë zjarri”, njoftoi policia.
Pranë viktimës u gjet një pistoletë, ndërsa burime të policisë thanë se ai ishte qëlluar pesë herë.
Mustafa kishte precedentë të mëparshëm penalë. Ai ishte arrestuar në vitin 2016 për armëmbajtje pa leje dhe si i dyshuar për përfshirjen në një grabitje. Nga personat e arrestuar bashkë me Mustafën, për armëmbajtje pa leje në vitin 2016, janë vrarë në atentat në mars 2019 edhe vëllezërit Astrit e Brahim Bilali.
Krimi dyshohet se është vijim i përplasjeve mes të ashtuquajturave grupeve “Bajri” dhe “Lici” në Shkodër, që ka shkaktuar gati 10 viktima, që prej fillimit të përplasjeve në qershor 2017 pas një atentati me eksploziv ku u plagosën 7 persona.
Vrasjet u pasuan me ekzekutimin e ish-oficerit të policisë Boran Berçama dhe bashkëjetueses së tij Silvana Ndoci, zhdukjen e dy personave dajë e nip, vrasjen e Fatbardh Licit i dënuar më herët për vrasje, dhe krime të tjera për të cilat ende nuk ka autorë të ndaluar apo të akuzuar.
Një operacion i policisë dhe ish-Prokurorisë së Krimeve të Rënda që çoi në arrestimin dhe më pas ndjekjen penale për një sërë veprash të të ashtuquajturve anëtarë të grupit “Bajri”, rezultoi një dështim pas dy vjetësh hetime. SPAK që trashëgoi dosjet e Krimeve të Rënda vendosi se nuk kishte prova për organizatë kriminale.
Të arrestuarit që u akuzuan fillimisht për vrasje dhe trafik ndërkombëtar narkotikësh, u dënuan për organizim bastesh në fund të vitit 2020 dhe shumica e tyre janë tashmë të lirë.
