Një Gjykatë e Bukureshtit dha të hënën dënime të pezulluara për dy ish-drejtues të Akademisë së Policisë, të cilët kishin udhëzuar një vartës të kërcënonte një gazetare e cila po hetonte plagjiaturën në institucion.
Ish-dekani i Akademisë së Policisë së Rumanisë, Adrian Iacob, dhe ish-zëvendësi i tij, Mihail Marcoci, kanëmarrë secili dënime të pezulluara me tre vjet burg për nxitje të një oficeri tjetër për të shantazhuar një gazetar i cili kishte zbuluar korrupsion në institucion.
Dyshja do të duhet të shërbejnë 120 ditë punë në komunitet dhe janë urdhëruar ta dëmshpërblejnë viktimën me 80,000 lei (më shumë se 16,200 euro), tha të hënën Gjykata e Apelit e Bukureshtit. Vendimi nuk është përfundimtar dhe mund të apelohet.
Në prill 2019 në celularin e Emilia Seran, një gazetare rumune e PressOne, erdhën mesazhe kërcënuese. Ajo kishte ekspozuar plagjiaturën e më shumë se dy të tretës së tezës së dekanit, si dhe raste të tjera të ngjashme midis profesorëve të institucionit.
“Po e dërgojmë këtë mesazh me qëllim të parandalojmë atë që do të vijë më pas. Çdo gjë varet nga ti”, thuhej në mesazh. “Ndaloji të gjitha aktivitetet e tua… nëse nuk dëshiron të fillojë një kalvar kryqëzim”, vazhdonte ai.
Iacob dhe Marcoci dhanë dorëheqjen nga Akademia e Policisë menjëherë pasi prokurorët e anti-korrupsionit filluan hetimin e tyre më 24 maj në 2019 mbi mesazhin kërcënues.
Sercan ka vazhduar të ekspozojë plagjiaturën e përhapur midis zyrtarëve të lartë të Akademisë dhe profesorëve. Sipas gazetares, 74.3 për qind e tezave të zhvilluara në institucion midis 2011 dhe 2016 janë të dyshuara për plagjiaturë.
Akademia e Policisë humbi të drejtën e saj për të dhënë doktoratura në tetor 2020 me urdhër të Ministres së Arsimit, Monica Anisie, e cila urdhëroi gjithashtu një ristrukturim të institucionit të shkatërruar nga korrupsioni.
Më 13 maj të këtij viti, Ministri i Brendshëm, Lucian Bode, njoftoi shpërbërjen e dy shkollave të doktoraturës brenda Akademisë së Policisë, të cilat, ai pranoi, “e kanë dëmtuar shumë imazhin e institucionit”.
Bode njoftoi gjithashtu një rirregullim të organeve arsimore të Ministrisë së Brendshme që do të përfshijë ngritjen e dy fakulteteve të reja, një për policinë dhe një tjetër për zjarrfikësit, si dhe punësimin e profesorëve të rinj “me një reputacion të padiskutueshëm akademik”.
