Shifrat e infektimeve me COVID-19 në Malin e Zi po rriten ndjeshëm, gjë e cila po përbën një dilemë për vendin, ekonomia e të cilit varet shumë nga turizmi i huaj.
Numri i rasteve të reja aktive me COVID-19 po rritet ndërsa Mali i Zi hyn në kulmin e sezonit turistik veror. Sipas Institutit të Shëndetit Publik, në vend janë 986 raste aktive me COVID-19. Kryeqyteti, Podgorica, dhe qytetet bregdetare të Budvës dhe Kotorrit kanë numrin më të madh.
Kreu i Institutit të Shëndetit Publik, Igor Galiç, tha të mërkurën se situata epidemiologjike në Malin e Zi është komplekse dhe se numri i infeksioneve të reja mund të rritet në javët e ardhshme.
“Numri i rasteve të reja në 14 ditët e fundit për 100,000 banorë është 134, ndërsa dy javë më parë ishte 50. Disa qytete kanë parë rritje edhe më të madhe, veçanërisht në pjesët bregdetare të vendit”, tha Galiç në parlament.
“Pritet një rritje në numrin e infektimeve me COVID-19 duke marrë parasysh numrin e turistëve që qëndrojnë në vend”, shtoi ai.
Sipas masave aktuale shëndetësore, në Malin e Zi lejohet hyrja pa nevojën e një testi negativ PCR apo një vërtetim vaksinimi për të gjithë shtetasit e BE -së dhe vendet e rajonit, si dhe për shtetasit nga Izraeli, Rusia, Ukraina dhe Bjellorusia.
Në përpjekje për të shpëtuar ekonominë e varur nga turizmi, ministrja e shëndetësisë Jelena Boroviniç Bojoviç tha më 12 maj se Mali i Zi do të ofrojë trajtim spitalor për të gjithë turistët që infektohen nga koronavirusi gjatë qëndrimit të tyre në vend, duke shtuar se kostot e tyre të shtrimit në spital do të mbulohen nga shteti. Mali i Zi gjithashtu siguron teste PCR për ata turistë që kanë nevojë që të kthehen në vendet e tyre.
Më 26 korrik, Ministri i Zhvillimit Ekonomik, Jakov Milatoviç, tha se 140,000 turistë ishin regjistruar në Mal të Zi, duke vënë në dukje se më shumë se 1.9 milionë njerëz kaluan kufijtë e Malit të Zi në tre muajt e mëparshëm.
Në përpjekje për të kontrolluar pandeminë, Ministria e Shëndetësisë ka ndaluar tubimet publike të mbyllura, festivalet muzikore, klubet e natës dhe diskotekat deri më 2 gusht.
Ministria njoftoi se një certifikatë kombëtare COVID-19 do të aktivizohet nga gushti dhe se vetëm ata që i kanë bërë të dy dozat e vaksinës dhe kanë teste negative PCR do të lejohen të marrin pjesë në festivale, koncerte dhe tubime të mbyllura.
Një epidemiolog, Nemanja Radojeviç, tha të enjten se nuk kishte nevojë për masa të reja kufizuese. Ajo që duhej ishte rritja e përqindjes së qytetarëve të vaksinuar kundër COVID-19.
“Në pragun e një vale të re dhe kërcënimesh të reja nga varianti Delta, duhet të kemi parasysh se rrethanat tani janë dukshëm ndryshe nga vetëm gjysmë viti më parë. Këto rrethana të reja kërkojnë masa të reja dhe ndryshe, dhe imunizimi masiv është aktualisht përgjigja e vetme e mundshme ndaj epidemisë”, postoi Radojeviç në Facebook.
Të enjten, Ministria e Shëndetësisë tha se 33.3 për qind e popullsisë së rritur të vendit tani ishte plotësisht e vaksinuar kundër COVID-19, ndërsa 37.9 për qind kishin marrë dozën e parë.
Ministria tha se po përgatit një strategji për një valë të re të pandemisë që pritet të ndodhë në shtator, duke theksuar se sistemi shëndetësor ishte gati të përballej me një rritje të mundshme të madhe të rasteve të COVID-19.
