Policia e Durrësit arrestoi një 54 vjeçar dhe shpalli në kërkim vëllain e tij 39 vjeç, pasi i akuzon se kanë djegur një sipërfaqe të madhe ullinjsh dhe shkurresh në fshatin Manskuri, pranë bregdetit të Durrësit.
Policia e Durrësit arrestoi të mërkurën një 54 vjeçar dhe shpalli në kërkim vëllain e tij 39 vjeç, pasi i akuzon se kanë djegur rreth 180 rrënjë ullinj dhe 10 hektarë me shkurre në fshatin Manskuri, pranë bregdetit të Durrësit.
“Këta shtetas në bashkëpunim me njëri-tjetrin, dyshohet kanë vendosur zjarr në pronën e shtetasit I. T., ku janë djegur 180 rrënjë ullinj, duke përfshirë dhe një sipërfaqe toke prej 10 hektarë me shkurre”, njoftoi policia.
Sipas njoftimit për mediat të Ministrisë së Mbrojtjes, zjarri ka rënë ditën e martë në orën 17:10 dhe u angazhuan 3 mjete dhe 9 efektivë për shuarjen e flakëve.
Policia sqaroi se u arrestua në flagrancë shtetasi Muharrem Çaushi dhe u shpall në kërkim vëllai i tij, Kujtim Çaushi. Ata akuzohen për veprën penale “Shkatërrim prone me zjarr”, të kryer në bashkëpunim.
Të dielën që lamë pas Policia e Krujës procedoi penalisht 57 vjeçarin Ramiz Stafasani, pasi aksidentalisht shkaktoi zjarr në vendin e quajtur “Kodra e Teqes”, në fshatin Borizanë të Krujës. Si pasojë e zjarrit u dogjën disa pemë frutore dhe burri u procedua për veprën penale “Shkatërrim i pronës me zjarr”.
I gjithë vendi dhe rajoni janë përfshirë nga vatra zjarri, një pjesë e të cilave dyshohen si raste të zjarr vënies së qëllimshme. Sipas Ministrisë së Mbrojtjes qarku më problematik është ai i Shkodrës, ku raportohet për 4 vatra zjarri.
Ndërsa zjarret në Qarkun Elbasan kanë prekur edhe sipërfaqet pyjore që janë të përfshira në UNESCO, në njësinë administrative Rrajcë, teksa Ministria e Mbrojtjes sqaroi zyrtarisht se mjetet dhe forcat të cilat janë nisur për këtë operacion e kanë të pamundur shuarjen e tij, pasi është terren i vështirë, por janë duke punuar në zonën ku mund të preken banesat.
