Dy ish-shoqëruesit e Tahirit, Hekuran Marku dhe Agustin Deda janë arrestuar në Gjermani dhe në Francë, ndërsa SPAK kërkon ekstradimin e tyre për hetimin e mëtejshëm të akuzave të trafikut të drogës.
Autoritetet e drejtësisë gjermane dhe franceze kanë ekzekutuar urdhërin ndërkombëtar të arrestit për dy ish-oficerët e policisë, Paul alias Agustin Deda dhe Hekuran Marku, të akuzuar për trafik ndërkombëtar të lëndëve narkotike.
Sipas Prokurorisë së Posaçme, SPAK, Deda dhe Marku kanë qenë pjestarë të grupit të shoqërimit të ish-ministrit të Brendshëm, Saimir Tahiri në kohën kur akuzohen se kanë kryer veprën penale.
Drejtuesi i SPAK, Arben Kraja i tha BIRN të mërkurën se kanë marrë konfirmim për ndalimin e Hekuran Markut në Gjermani dhe të Agustin Dedës në Francë.
“Jemi në pritje për të dy, pasi kemi përcjellë dokumentacionin, të gjitha aktet që duhen,” tha Kraja.
Pritet që dy ish-oficerët e policisë të ekstradohen dhe të gjykohen në Gjykatën e Posaçme për Korrupsionin dhe Krimin e Organizuar së bashku me dhjetëra persona të tjerë, mes tyre edhe prokurori i Vlorës Maksim Sota; shefi i sektorit të trafiqeve në Drejtorinë e Përgjithshme të Policisë së Shtetit, Ilirjan Balla, si dhe ish-oficeri i policisë Festim Lelaj.
Dy ish-truprojat e Tahirit, Marku dhe Deda i kundështojnë akuzat, sipas një komunikimi që BIRN pati me avokatin e tyre, Tonin Prendi.
“E vërteta është se persona të ndryshëm kanë abuzuar me emrat e tyre, duke lënë të kuptohej se pas tyre qëndronin Hekurani dhe Agustini, edhe pse këta të fundit nuk kishin asnjë dijeni për kryerjen e ndonjë aktiviteti kriminal,” tha avokati Prendi.
Prendi shtoi se nga bisedat me klientët e tij kishte mësuar se dy ish-truprojat e Tahirit kishin njohje me personat që kishin përdorur emrat e tyre si pasojë e fushatës elektorale të zhvilluar asokohe në zonën e Kombinatit.
Rezultatet e një hetimi disa vjeçar të zhvilluar nga autoritetet shqiptare me ato italiane të koduar si operacioni “Shpirti”, u njoftuan gjatë një konference për shtyp të zhvillur nga SPAK dhe Antimafia italiane më 4 korrik.
SPAK njoftoi atëherë se mes të akuzuarve ishin edhe dy oficerët e policisë që bënin pjesë në grupin e shoqërimit të ish-Ministrit të Brendshëm, që në atë kohë ishte Saimir Tahiri, edhe pse ky i fundit nuk u përmend me emër. Tahiri u gjykua për trafik ndërkombëtar droge por u gjet i pafajshëm në shkallë të parë për këtë vepër penale dhe u dënua për “shpërdorim detyre”. Çështja e tij është në proces rigjykimi. Tahiri është deklaruar i pafajshëm ndaj akuzave.
Operacioni lidhet me valën e kultivimit dhe trafikimit masiv të kanabisit në Shqipëri para zgjedhjeve të vitit 2017 dhe hedh dritë për kriminalizimin e përgjithshëm të Policisë së Shtetit deri në nivelet e saj më të larta në atë kohë.
Gjatë konferencës për shtyp prokurorët thanë se katër grupet kriminale të goditura merreshin jo vetëm me trafik marijuane, por edhe me trafik heroine e kokaine.
Operacioni shumëvjeçar ka identifikuar shumë episode të trafikut të drogës, si dhe janë kryer sekuestrime preventive të katër kompanive dhe 11 pronave të paluajtshme në Vlorë, Kavajë e Tiranë, mes tyre restorante, hotele dhe troje ndërtimi.
Dosja hetimore e grupit të përbashkët Italian dhe shqiptar zbulon se si dy skafistë nga zona e Kavajës rrëfyen të gjithë aventurat e tyre dhe morën statusin e bashkëpunëtorit të drejtësisë, pasi u dënuan me 20 vjet burg.
*Ky shkrim u amendua për të reflektuar përgjigjen e avokatit të të pandehurve Hekuran Marku dhe Agustin Deda, e cila mbërriti përmes aplikacionit Whatsapp pasi një version i parë i shkrimit ishte botuar.