Policia e Durrësit arrestoi një 50 vjeçar të cilit i gjeti 4 mina me telekomandë, të lidhura me aparate celularë. Në më pak se një vit policia në Durrës ka sekuestruar 9 eksplozivë të tillë.
Policia e Durrësit arrestoi një 50 vjeçar të cilit i gjeti 4 mina me telekomandë, të lidhura me aparate celularë për shpërthim në distancë, të cilat po tentonte t’i shiste në rajonin e Durrësit.
Ai u ndalua në kuadër të operacionit të koduar “Furnitori” dhe dyshohet se minat do t’i shiste kundrejt çmimit 10 mijë euro.
Policia e cilësoi operacionin si parandalimin e një ngjarje të mundshme kriminale dhe ai u zhvillua pas informacioneve në rrugë operative se një person me tendencë kriminale në fushën e prodhimit dhe shitjes së minave me telekomandë po tentonte të shiste mina me telekomandë.
Poseduesi i tyre, Arben Elezi, ishte banues në fshatin Larushk, të Fushë-Krujës, por në momentin e ndalimit gjendej në fshatin Shkafanë të Durrësit.
Minat dhe lëndët eksplozive përdoren në atentate me qëllim eliminimin fizik apo për të shantazhuar dhe përcjellë mesazhe.
Më 16 gusht rreth orës 03:15 persona ende të paidentifikuar u futën në një firmë për prodhimin e lëndëve ndërtuese në Shkozet të Durrësit dhe i vendosën një sasi eksplozivi e cila nuk shpërtheu.
Ndërkohë më 3 qershor të këtij viti Policia e Durrësit arrestoi tre persona dhe i sekuestroi tre mina me vlerë sipas saj rreth 9000 euro. Më herët, më 16 mars Policia e Durrësit arrestoi 2 persona të cilëve u sekuestroi 4 mina me telekomandë të lidhura me aparate celularë për shpërthim në distancë, të cilat do t’i shisnin tek persona të tjerë.
Ndërsa më 23 dhjetor Policia e Durrësit ndaloi një 29 vjeçar, i cili kishte në posedim 2 mina të lidhura me aparate celularë për shpërthim në distancë.
Përveç trafikimit të minave të gatshme për shpërthim në distancë, edhe rastet e tregtimit të eksplozivit kanë qenë të pranishme muajt e fundit. Më 1 qershor Policia e Durrësit njoftoi arrestimin e 3 personave dhe sekuestrimin e disa kilogramëve eksploziv të llojit TNT (tritol) dhe C4, si edhe granata dore, kapsolla detonatore dhe një pushkë automatike.
