Thirrjet për dorëheqjen e ministrit të shëndetësisë Venko Filipçe, pas zjarrit të së mërkurës në spitalin modular të Tetovës, janë shtuar, por ministri thotë se do të presë rezultatet e hetimit para se të vendosë nëse do të japë dorëheqjen.
Partitë opozitare, kritikët qeverisë dhe disa mjekë kanë kërkuar dorëheqjen e ministrit të shëndetësisë të Maqedonisë së Veriut, Venko Filipçe, lidhur me zjarrin që i mori jetën 14 personave në spitalin modular të Tetovës në fillim të kësaj jave.
Filipçe të enjten premtoi një hetim të pavarur për zjarrin, por tha se do të mendonte për dorëheqjen e mundshme vetëm pasi të merren rezultatet e hetimit.
“Filipçe nuk ka përgjigje për asnjë nga pyetjet për të cilat interesohet publiku, por është i sigurt për një gjë – se ai nuk do të japë dorëheqjen”, tha zëdhënësi i partisë kryesore opozitare VMRO DPMNE, Dimce Arsovski.
Duke akuzuar Ministrin e Shëndetësisë, por edhe të gjithë qeverinë e udhëhequr nga Social Demokratët për paaftësi, ai kërkoi dorëheqjen e menjëhershme të tij.
“Hetimi i paanshëm dhe objektiv për shkaqet e zjarrit, për fat të keq, është i pamundur pa dorëheqjen e kryeministrit Zoran Zaev dhe Venko Filipçes, të cilët të dy mund të ndikojnë në hetimin”, tha Arsovski të enjten pas daljes publike të Filipçes.
Të enjten, Filipçe u tha gazetarëve se do të merrte parasysh dorëheqjen vetëm pasi të përfundojë hetimi.
“Nuk po i largohem përgjegjësisë, por… do të pres që të përfundojë hetimi. Duke pasur parasysh se nevojitet menaxhimi i disa prej pacientëve, të përfundojë kryerja e autopsive dhe kështu me radhë, pas përfundimit të hetimit, unë do të marr një vendim nëse do të jap apo jo dorëheqjen time”, tha Filipçe.
Ministri garantoi se hetimi do të ishte objektiv – qeveria tashmë ka pranuar një ofertë ndihme nga aleatët e NATO-s në hetimin e shkaqeve të zjarrit, të cilët do të dërgojnë ekspertë për të ndihmuar hetuesit vendas.
Spitali modular në qytetin perëndimor të Tetovës shpërtheu në flakë të mërkurën në mbrëmje dhe flakët i morën jetën 14 pacientëve. 12 pacientë të tjerë u evakuuan në kohë dhe jeta e tyre tani është jashtë rrezikut.
“Nëse do të ishim një vend normal… Filipçe do të kishte dhënë dorëheqjen menjëherë, pa pritur ‘rezultatet’ e hetimit. Për më tepër, qeveria duhet ta kishte shkarkuar atë!!!” tha Solza Grceva, një ish-deputete e Partisë Social Demokrate në pushtet, tani një kritike e ashpër e qeverisë.
Ajo shtoi se menaxherët dhe pronarët e firmës që ndërtoi spitalin modular, si dhe ata në Ministrinë e Shëndetësisë që i dhanë dritë jeshile punimeve të tyre, duhet të ishin ndaluar.
Disa mjekë, gjithashtu kanë bërë thirrje për dorëheqjen e ministrit të shëndetësisë.
“Është një përgjegjësi morale jo vetëm për ministrin konkret, por që kushdo në këtë situatë të japë dorëheqjen. Dhe para kësaj, ministri duhet të kishte shkarkuar të gjithë ata që ishin përgjegjës për menaxhimin e spitalit të Tetovës”, tha një mjek.
Megjithatë, humbja e një figure popullore si Filipçe tani, përpara zgjedhjeve lokale të caktuara të mbahen në tetor, do të ishte një goditje për Social Demokratët në pushtet. Neurokirurgu Filipce u bë ministër shëndetësie në vitin 2017. Daljet e shpeshta publike gjatë pandemisë së COVID-19 kanë bërë që ai të ekspozohet shumë dhe sondazhet sugjerojnë se ai është një nga figurat më të njohura brenda Social Demokratëve.
Pasi fitoi një reputacion për daljet e tij të qeta gjatë krizës shëndetësore, dhe pasi luajti një rol të rëndësishëm në fushatën e partisë së tij për zgjedhjet e përgjithshme të parakohshme të mbajtura në verën e vitit 2020, në maj të këtij viti ai u ngrit në detyrë dhe u bë një nga katër nënkryetarët e Social Demokratëve.
