60-vjeçari Muharrem Plaku mbeti i bllokuar në një prej galerive minerare të Bulqizës pas rënies së një masivi shkëmbor. Një grup i avari-shpëtimit po punon prej orësh për nxjerrjen e minatorit.
Tekniku i një galerie të nxjerrjes së kromit në Bulqizë mbeti i bllokuar në minierë pas shembjes së një masivi shkëmbor mesditën e të mërkurës. Policia njoftoi se ngjarja ndodhi rreth orës 12.10 minuta. Ndërkohë u mësua se në galeri është bllokuar Muharrem Plaku 60 vjeç, i cili punonte si teknik në galerinë ku ndodhi aksidenti.
BIRN mësoi se ngjarja ndodhi në galerinë e kompanisë “Kaduretex Sh.p.k”, me aksionar ish-kryebashkiakun e Bulqizës Myfit Duriçi dhe të afërm të tij. “Nuk dihet ende fati i të bllokuarit. Grupet e shpwtimit janw duke pastruar”, tha Duriçi gjatë një telefonate për BIRN. Ai tha se nuk e dinte edhe si kishte ndodhur aksidenti.
Në vendin e ngjarjes prej mesditës ndodhet një grup i avaro-shpëtimit, të minierave, i cili po punon për pastrimin e galerisë, për t'i ardhur në ndihmë minatorit, që dyshohet se është bllokuar brenda saj.
Ky është incidenti i tretë në minierat e Bulqizës në më pak se një javë. Situata e sigurisë në minierat e kromit është prej kohësh me probleme. Vetëm vitin që shkoi në Bulqizë u shënuan 5 të vdekur në galeri dhe 28 të plagosur.
