Kuvendi miratoi të enjten aktin normativ për zgjatjen e marrëveshjes mes qeverisë shqiptare dhe kompanisë Pfizer Export B.V. për prodhimin e një sasie të re vaksinash anti-COVID për Shqipërinë. Amendimi i kontratës bazë me kompaninë “Pfizer”, sipas ministrisë së Shëndetësisë siguron më shumë se 500 mijë vaksina në vlerën 6 milionë USD.
Akti Normativ u miratua me 126 vota pro dhe asnjë kundër, por seanca plenare u shoqërua me debate politike për menaxhimin e pandemisë.
Kryetari i Partisë Demokratike, Lulzim Basha, tha se qeveria ka dështuar.
“Qytetarët tashmë e dinë që kanë gënjyer për ndihmën ekonomike, që kanë gënjyer për rimbursimin e të prekurve nga Covid-19, që kanë gënjyer për tenderat abuzivë në kohë pandemie, të mveshura me sekretin shtetëror, por, mbi të gjitha, që kanë gënjyer për numrin e jetëve të humbura,” tha Basha duke iu referuar socialistëve në pushtet.
Ai theksoi se numrin e lartë të vdekjeve të padeklaruara e “konfirmomon edhe raporti i Komisionit Europian, në të cilin njoftohet se Shqipëria ka shtesën më të lartë të vdekjeve në Europë për vitin 2020.”
Kryetari i opozitës shtoi se dështoi skema e rimbursimit të mjekimit, ndërsa shqiptarët harxhuan mesatarisht 1.000 dollarë për t'u kuruar nga COVID-19. Sipas tij, edhe për skemën e ndihmës ekonomike për qytetarët e bizneset që u prekën nga pandemia, Shqipëria mban vendin e fundit në Ballkan.
Me Bashën replikoi ministrja e Shëndetësisë dhe Mbrojtjes Sociale, Ogerta Manastirliu, që i cilësoi akuzat e opozitës si “retorikë politike me vdekjen”.
“Keni 18 muaj që hiqni vallen e vdekjes,” i tha ajo Bashës, duke shtuar se Shqipëria e ka menaxhuar me sukses pandeminë.
“Shqipëria ia ka dalë edhe ndërkombëtarisht që t'i fitojë betejat e vështira të një kohe shumë të vështirë siç është pandemia e Covid-19. Loja me të vdekurit është një avaz i vjetër i kësaj politike shterpë,” tha Manastirliu.
Ajo bëri thirrje që opozita të nxisë qytetarët që të vaksinohen.
Ndërsa ministrja e Financave dhe Ekonomisë, Delina Ibrahimaj, kundërshtoi akuzat e Bashës për ndihmën ekonomike për pandeminë. Sipas saj, falë paketave mbështetëse Shqipëria shënoi rritjen ekonomike më të lartë në rajon përgjatë 3-mujorit të dytë të këtij viti.
Me marrjen e 500 mijë dozave Pfizer brenda këtij viti pritet që numri i vaksinave që kanë hyrë në Shqipëri të arrijë mbi 3 milion doza.