Xhelal Reçi, 61 vjeç u qëllua ndërsa po hapte dyqanin në qendër të Laçit mëngjesin e të hënës. Policia gjeti një makinë të djegur që dyshohet se u përket autorëve.
Një ish-efektiv policie u vra në një atentat me armë zjarri mëngjesin e të hënës në qytetin e Laçit. Policia e qytetit bëri me dije se 61-vjeçari Xhelal Reçi nga fshati Gjorm i Kurbinit, u qëllua rreth orës 7.30.
Viktima ka qenë më herë punonjës i policisë rrugore dhe sipas dëshmitarëve u qëllua, sapo doli nga makina e tij tip ‘Benz’ për të hapur biznesin në pronësi të tij, një dyqan në qendër të Laçit.
Policia njoftoi se pak minuta pas vrasjes në Milot është gjetur dhe një makinë e djegur, që mendohet se është përdorur nga autorët e ngjarjes. Ndërkohë shërbimet e policisë bënë me dije se kanë rrethuar zonën, si dhe janë ngritur pika kontrolli, me qëllim kapjen e autorit.
Në ndihmë të policisë lokale janë nisur grupe të FNSH-së dhe një grup i posaçëm hetimor për të bërë të mundur zbardhjen e plotë të rrethanave të ngjarjes, identifikimin dhe kapjen e autorëve.
Viktima Reçi nuk ka precedentë të mëparshëm penalë dhe ishte shkëputur nga policia prej 15 vitesh. Një vit më parë persona të paidentifikuar i bënë atentat edhe të birit të Reçit, ai u qëllua nga dy persona në një motor në Shëngjin, por nga atentati nuk pati pasoja.
