Komisioni i Ligjeve miratoi projektligjin kontrovers “Për bashkëqeverisjen” vetëm me votat e anëtarëve socialistë, pa marrë parasysh kritikat e opozitës dhe shqetësimet e shoqërisë civile për kontrollin e administratës publike dhe mbivendosjen e kompetencave.
Deputetët socialistë në Komisionin e Ligjeve votuan të martën pro projetkligjit “për Bashkëqeverisjen”, pavarësisht kritikave nga opozita dhe organizatat e shoqërisë civile për kompetencat kontrolluese mbi administratën publike nga një agjenci në varësi të kryeministrit.
Relatorja e projektligjit, Klotilda Bushka e mbrojti projektligjin si një hap të rëndësishëm në shërbim të qytetarëve.
“Me këtë Agjenci krijojmë one stop shop për të gjitha ankesat,” tha Bushka, ndërsa përsëriti disa herë se detyrat e Agjencisë janë komplementare dhe nuk mbivendosen me kompetencat e institucioneve të tjera.
Por deputeti demokrat, Enkelejd Alibeaj kërkoi shfuqizimin e projektligjit, duke e akuzuar qeverinë se me anë të kësaj Agjencie po ngre një sistem ‘patronazhimi politik me ligj’.
Alibeaj argumentoi në komision se projektligji shkel parimet kushtetuese, cënon ligje të tjera të miratuara me shumicë të cilësuar votash dhe i jep kompetenca një drejtori mbi krerët e institucioneve të vendit.
“Ka vetëm dy mënyra se si kontrollohet administrata civile, kontroll administrativ i brendshëm dhe gjyqësor, çdo instrument tjetër kontrolli është politik,” tha ai.
Projektligji “për Bashkëqeverisjen” është kritikuar edhe nga Komiteti Shqiptar i Helsinkit, KSHH, i cili ka dërguar me shkrim vërejtjet për formulimin e disa neneve, duke vënë theksin në centralizimin e pushtetit, mbivendosjen e kompetencave, papërputhshmërinë me ligje të tjera, garantimin e të dhënave personale dhe përdorimin e sloganeve politike në hartimin e tij.
KSHH argumenton se ligji bie ndesh me disa ligje të tjera në fuqi, si ai për Konsultimin Publik, Kodi i Procedurave Administrative apo për Organizimin dhe Funksionimin e administratës shtetërore, duke e cilësuar “një dyzim të kuadrit ligjor”.
KSHH ngre pikpyetje edhe për marrëveshjet me bashkitë që parashikon ligji, duke e parë këtë si cënim të parimit të decentralizimit të organeve të pushtetit vendor.
“Çdo institucion vepron dhe kontrollon në bazë të kompetencave që i jep ligji, ku ligjet me shumicë të cilësuar dhe ligjet organike të institucioneve (në rastet kur kanë), kanë epërsi. Në këtë situatë do të krijohej një mbivendosje kompetencash që mund të cënonte parimin e sigurisë juridike dhe qartësisë së ligjit, dhe rrjedhimisht dhe efektivitetit të zbatimit të tij në praktikë,” thuhet në komentet e KSHH.
Një tjetër organizatë që ka dërguar vëretje për ligjin është ICC Albania, e cila hedh dyshime për rolin e kësaj agjencie në raport me kompetencat e Gjykatës Administrative dhe Kodin e Procedurave Administrative .
Me 13 vota pro, 6 kundër dhe me disa ndryshime teknike në formulimin e neneve, por që nuk preknin thelbin e tij, projektligji i qeverisë pritet tashmë të votohet në seancë plenare.
