Një grua, punonjëse sociale në një institucion për të moshuarit në Itali u arrestua në Durrës me akuzën e kontrabandës së ilaçeve, ndërsa një zyrtar në Lezhë u shpall në kërkim.
Policia e Durrësit arrestoi një 56 vjeçar, që punonte si punonjëse sociale në Itali dhe shpalli në kërkim shefin e shërbimeve pranë Njësisë Vendore të Kujdesit Shëndetësor Lezhë, të dyshuar për kontrabandë me medikamente mjekësore.
Arrestimi dhe shpallja në kërkim u bë pasi agjentët e doganës dhe policia në Degën e Doganës së Portit Durrës pas kontrollit në një automjet gjetën një sasi medikamentesh mjekësore të ngarkuara në një depo për grumbullimin e ndihmave humanitare në qytetin e Firences, në Itali.
Sipas deklaratës së policisë për mediat ato po transportoheshin drejt Shqipërisë me pretendimin se janë ndihma humanitare për një shoqatë në qytetin e Lezhës.
Në kuadër të operacionit policor të koduar “Ndihmat”, policia njoftoi se arrestoi 56 vjeçaren me iniciale A. B., lindur në Mat dhe banuese në Itali, punonjëse sociale në një institucion privat për kujdesin ndaj të moshuarve në Itali.
Si edhe shpalli në kërkim 33-vjeçarin A. P., banues në Lezhë, me detyrë shef i Shërbimeve pranë Njesisë Vendore të Kujdesit Shëndetësor Lezhë. Ata dyshohen për kryerjen e veprave penale “Kontrabanda me mallra të licensuara” dhe “Shpërdorim detyre”.
Më herët në Portin e Durrësit policia dhe dogana ka zbuluar disa raste të kontrabandës me medikamente mjekësore dhe në një operacion arrestoi edhe 2 doganierë, që dyshohet se kanë shpërdoruar detyrën duke mos kryer kontrollin e imtësishëm të mjetit ku u gjetën mallrat kontrabandë.
