Monitorimi i 6 bashkive në vend nga organizata të shoqërisë civile ka gjetur se ato kanë buxhete minimale për kujdesin social dhe të pamjaftueshme për të garantuar barazi në çështjet gjinore.
Monitorimi i buxheteve të 6 bashkive në vend nga organizatat të shoqërisë civile me mbështetje të UN Women, ka gjetur se ato kanë buxhete minimale për kujdesin social dhe të pamjaftueshme për të garantuar barazi në çështjet gjinore.
Raportet për 6 bashkitë, Skrapar, Poliçan, Fushë Arrëz, Vlorë, Elbasan dhe Durrës u prezantuan të martën në një takim që u mbajt në Hotel Tirana International.
Përfaqësues të institucioneve shtetërore, përfaqësues të OJF-ve, si dhe të Institutit për Demokraci dhe Ndërmjetësim (IDM) dhe UN Women Albania ishin të pranishëm në prezantimin e raporteve monitoruese. Sipas organizatorëve këto synojnë të nxisin llogaridhënien në buxhetimin e bashkive, duke mbajtur në konsideratë se si programet buxhetore reflektojnë nevojat vendore edhe nga perspektiva gjinore.
Raimonda Duka, eksperte kombëtare e UN Women në Shqipëri, tha se nga monitorimi kishte rezultuar se buxhetet e investimet më të mëdha shkojnë për infrastrukturën dhe mbrojtja sociale nuk ka vëmendjen e duhur.
“Burimet njerëzore të dedikuara për mbrojtje sociale janë të pamjaftueshme në bashkitë e vogla”, vërejti Duka.
Brunilda Dervishaj, përfaqësuese e Ministrisë së Shëndetësisë dhe Mbrojtjes Sociale në takim, pranoi ekzistencën e problematikave. “Këto probleme janë të njohura prej Ministrisë sonë”, tha Dervishaj. “Sipas nesh, pavarësisht se strategjia për barazinë gjinore sapo është miratuar, bashkitë duhet të bëjnë më tepër për ngritjen e fondeve të qëndrueshme për nevojat vendore të komunitetit në të ardhmen”, tha ajo.
Gentiana Deçolli, përfaqësuese e Organizatës për Mirëqenien Sociale, që kishte monitoruar bashkitë Skrapar dhe Poliçan, tha se ato nuk kishin parashikuar fonde të reja në shërbim të kujdesit shoqëror. Ajo shtoi se gjithashtu në këto bashki nuk ekzistojnë qendra pritëse për gratë viktima të dhunës dhe se vetëm 2.5 për qind e personave që kishin nevojë për ndihmë sociale e merrnin atë.
Por situata nuk ishte e ndryshme as në bashkitë më të mëdha si Elbasani, Durrësi e Vlora, ku buxhetet për mbrojtje sociale, kulturë e të ngjashme, varjonin 2 deri në 9 për qind.
“Investimet për funksionin e mbrojtjes sociale, argëtimit, kulturës dhe fesë përbëjnë 8,78% të buxhetit total, me tendencë në rënie për periudhën 2023-2024”, tha Mirela Gjoni, nga organizata “Forumi i Gruas Elbasan”.
Edhe për bashkinë Vlorë, përfaqësuesja e Institutit të Kulturës Rome në Shqipëri, Aurora Koci, u shpreh se shpenzimet për mbrojtjen sociale zënë një peshë shumë të ulët të shpenzimeve totale. “Shpenzimet për mbrojtjen sociale përbejnë vetëm 2,4% të buxhetit total”, tha Koci.
Raporti vëren se edhe bashkia Durrës gjithashtu lë për të dëshiruar në shpërndarjen e fondeve për menaxhimin e rasteve të dhunës në familje. “Mbrojtja sociale zë vetëm 4,9% të shpenzimeve totale, për qindjen më të ulët në programet buxhetore të planifikuara për vitin 2022”, citoi Xhensika Bezati, nga “Qëndra Konsumatori Shqiptar” në Durrës.
Për bashkinë e Fushë-Arrëzit, Arta Nikolli, nga “Qëndra Rinore Arka”, në Shkodër, u shpreh se kjo bashki është një prej më të varfërave në Shqipëri, me një varësi të madhe nga të ardhurat e buxhetit qëndror, duke e bërë të pamundur financimin e politikave vendore.
Për përgatitjen e raporteve të monitorimit gjatë periudhës kohore Mars- Nëntor 2021 janë përzgjedhur 10 Organizata të Shoqërisë Civile në Skrapar, Poliçan, Fushë-Arrëz, Vlorë, Elbasan, dhe Durrës, të cilat janë trajnuar nga ekspertë të UN Women në Shqipëri dhe janë asistuar nga IDM Albania gjatë procesit të hartimit të raporteve. “Ne kemi synuar nëpërmjet trajnimeve ngritjen e kapaciteteve të OSHC-ve për të kërkuar llogari në shpërndarjen e buxhetit”, tha Erisa Çela, përfaqësuese e UN Women në Shqipëri.
