Sipas SPAK, ish-drejtuesi i Prokurorisë së Kukësit, Edmond Kariqi ka pranuar rryshfet në këmbim të favorizimit të personave nën hetim.
Prokuroria e Posaçme kundër Korrupsionit dhe Krimit të Organizuar, SPAK njoftoi të enjten se ka përfunduar hetimet dhe dërguar për gjykim çështjen në ngarkim të ish-drejtuesit të Prokurorisë së Kukësit, Edmond Kariqi, i akuzuar për korrupsion pasi ka marrë vlera monetare në këmbim të favorizimit të disa shtetasve nën hetim.
“..I pandehuri Dritan Dedja me ndërmjetësimin dhe ndihmën e të pandehurve Emirjan Beu dhe Isuf Gega, i ka dhënë të pandehurit Edmond Kariqi, i cili ushtronte funksionin e drejtuesit të Prokurorisë pranë Gjykatës së Shkallës së Parë Kukës, përfitime monetare të padrejta, me qëllim për të favorizuar shtetasin Ramadan Dedja dhe persona të tjerë nën hetim,” thuhet në njoftimin e SPAK.
Prokurori Edmond Kariqi akuzohet për veprën penale “korrupsioni pasiv i gjyqtarëve, prokurorëve dhe funksionarëve të tjerë të drejtësisë”, ndërsa të pandehurit Dritan Dedja, Emirjan Beu dhe Isuf Gega për korrupsion aktiv. Prokurori Kariqi u arrestua për 30 qershor.
