I thirrur në prokurori një ditë pas Berishës, Basha tha për mediat se nxiste drejtësinë që të hetonte deri fund atë që ndodhi në 8 janar në selinë e Partisë Demokratike.
“Drejtësia duhet të zbardhë gjithçka, të vërë para përgjegjësisë ata që organizuan, frymëzuan dhe ushtruan aktet e dhunës kundër nesh dhe nxitën vëllavrasje,” tha ai.
Basha shprehu gjithashtu keqardhjen për kohën e çuar dëm nga opozita në këtë përplasje politike dhe akuzoi ish-mentorin e tij për nxitjen e dhunës.
“Ne ishim përgatitur për çdo skenar dhe kishim si qëllim të shmangnim me çdo kusht gjakderdhjen,” shtoi ai.
Në lidhje me mbështetësit e tij që shihen në pamjet e transmetuara në media në përplasjet e dhunshme, Basha tha se “nuk kam arritur t’i identifikoj”.
Të enjten, Berisha pretendoi pas daljes nga prokuroria se në selinë e PD-së kishte persona të armatosur me rekorde kriminale dhe fondamentalistë sirianë. “Nuk kërkohen prova për të rrëzuar gënjeshtra,” tha Basha i pyetur për këto akuza.
Edhe sekretari i përgjithshëm i PD-së, Gazmend Bardhi, dëshmoi të premten në prokurori. Ai tha se ka sqaruar akuzat se mes personave të pranishëm në seli atë ditë kishte njerëz të armatosur.
“Kam dhënë shpjegime të plota në lidhje me këtë dhe kam rikonfirmuar atë që në fakt prokurorët kanë qenë dëshmitarë bashkë me mua, që çdo person që ka qenë brenda selisë qendrore të Partisë Demokratike i është nënshtruar një kontrolli fizik, sikundër çdo ambient i brendshëm i selisë i është nënshtruar këqyrjes dhe kontrollit nga ana e prokurorisë,” tha ai.
Në protestën e thirrur nga Berisha protestuesit përdorën shkallë, vare dhe shufra hekuri, në përpjekje për të shpërthyer dyert e selisë së PD-së, ndërsa mbështetësit e Bashës brenda selisë u kundërpërgjigjën me gaz lakrimogjen, përpara se të ndërhynte policia.
