Presidenti Ilir Meta njoftoi të premten se ka nisur procedurat për shpalljen e zgjedhjeve të parakohshme të pjesshme për disa bashki të vendit. Ai priti deri në zbardhjen e vendimit të Gjykatës Kushtetuese për ligjshmërinë e zgjedhjeve të mbajtura në qershor të vitit 2019, të cilat u bojkotuan nga opozita dhe ishin shfuqizuar me dekret të presidentit.
Meta sulmoi Gjykatën Kushtetuese ‘për mungesë përgjegjshmërie’ lidhur me vendimin e marrë prej saj në nëntor 2021, vendim që rrëzonte kërkesën e Shoqatës së Bashkive për shfuqizimin e këtyre zgjedhjeve si anti-kushtetuese. Gjithashtu, ai akuzoi anëtarët e Kushtetueses për “shkelje të rënda” në përgatitjen e dosjes për Komisionin e Venecias lidhur me këtë çështje. Komisioni i Venecias i cilësoi jobindëse argumentet e Metës për anulimin dhe shtyrjen e këtyre zgjedhjeve.
“Me vendimmarrjen e saj, Gjykata Kushtetuese, nuk pati vullnet ta zgjidhte këtë çështje përmes juridiksionit gjyqësor kushtetues, por ia la sërish çështjen juridiksionit “politik”, tha Meta në një konferencë për mediat.
Ai akuzoi se disa gjyqtarë kanë bërë shkelje të rënda në hartimin e dosjes për këtë rast. “Institucioni i Presidentit të Republikës ka konstatuar se disa anëtarë të Gjykatës Kushtetuese, ku kryesisht barra kryesore e përgjegjësisë bie mbi relatoren e çështjes, ka të dhëna se kanë kryer disa shkelje të rënda profesionale dhe etike që cenojnë pozitën dhe figurën e gjyqtarit gjatë ushtrimit të mandatit,” tha Meta, duke shtuar se këto veprime legjitimonin “fillimin e një procedimi disiplinor”.
Shkelja sipas tij konsiston në mungesën e një shorti për caktimin e relatorit dhe se në mënyrën e hartimit të dosjes për “Venecian”, ku nuk janë futur pyetjet e shoqatës së bashkive.
Duke justifikuar vonesën e shpalljes së zgjedhjeve të pjesshme me pritjen e një vendimi nga Kushtetuesja, Meta bëri të ditur nisjen menjëherë të procedurave duke i dërguar një letër KQZ-së, ku i kërkon informacion zyrtar për vakancat në pushtetin vendor. Zgjedhjet pritet të prekin 6 bashki, ku kryetarët kanë humbur mandatin për shkaqe të ndryshme.
I pyetur për çështjen e shkarkimit të tij, e cila pret një vendim të Gjykatës Kushtetuese pas një vendimi të parlamentit, Meta tha se “ka zero çështje”. “Gjykata aq këllqe kishte. Nuk është ky problem im,” tha ai, duke shtuar se kishte pritur që të bëheshin zgjedhje lokale në të gjithë Shqipërinë.
Presidenti i komentoi përplasjet në Partinë Demokratike si krizë legjitimiteti, duke dënuar dhunën nga të dy krahët. Ndërkohë, shpallja e zgjedhjeve vendore të pjesshme prej tij vjen në një moment kur opozita është e përçarë.
