Mbi 10 hektarë bimësi në zonën e mbrojtur lagunore të Kunes në Shëngjin u shkrumbuan nga zjarri duke gdhirë e enjtja. Flakët u njoftuan rreth orës 12:00 të së mërkurës dhe të favorizuar nga era e bimësia e dendur u përhapen me shpejtësi në territorin e mbrojtur.
Ndërhyrja e zjarrfikësve ishte e pamundur për shkak të mungesës së rrugës dhe ata u fokusuan të ndalonin përhapjen e flakëve në zonën e banuar. Pas ndalimit të erës flakët u izoluan dhe zjarri u shua thuajse plotësisht në mëngjes.
Eksperti i Mjedisit Jak Gjini thotë se dëmi i shkaktuar për biodiversitetin është shumë i madh. “Kjo është një situatë e përsëritur gjatë kohëve të fundit dhe zjarri ka shkaktuar një dëm mjaft të madh për biodiversitetin në këtë zonë të mbrojtur lagunore. Shkatërrohet bimësia, por edhe gjallesat të cilat janë të shumta në këtë zonë”, tha Gjini në një bisedë telefonike.
Administrata e Zonave të Mbrojtura në Lezhë bën më dije se zjarri ka përfshirë sipërfaqe të llojit xunkth e shënuar në hartë si zonë buferike dhe nuk kanë prekur fondin pyjor.
“Fatmirësisht flakët nuk kanë prekur fondin pyjor. Zjarri tashmë është izoluar dhe bashkë me autoritetet e tjera po punojmë për përcaktimin e shkaqeve”, thotë Besiona Simoni Specialiste ADZM Lezhë.
Zjarret të tilla në natyrë janë të pazakonta në ditë të ftohta dhe të lagështa dimri dhe policia thotë se po heton për zjarr vënie të qëllimshme.
Në fakt zjarri në lagunë shpërtheu vetëm pak ditë pasi me vendim qeverie 91.4 për qind e sipërfaqes së mbrojtur në bregdetin nga Ishmi në Kune-Vain u hoq nga lista e zonave të mbrojtura. Sipërfaqja në këtë zonë u reduktua nga mbi 93 mijë hektarë në vetëm 8 mijë hektarë.
Vendimi i qeverisë u kritikua ashpër nga organizatat mjedisore që e cilësuan atë shkatërrues për lagunat si Kune, sipërfaqet e mbrojtura të cilave kufizohen në masë të madhe.
“Pas tyre fshihen zhvillime të paqëndrueshme, si urbanizim, aeroporte, bujqësi intensive, sipërfaqe habitatesh të mbuluara nga parqe industriale me panele fotovoltaike dhe turbinat ere etj”, thuhet në reagimin e 25 organizatave dhe 4 profesorëve, të cilët i shohin ndryshimet e bëra si një hile e qeverisë për t’i hapur rrugë një sërë projektesh ndërtimi në bregdet.
