Mbledhja e Gjyqtarëve të Gjykatës së Lartë zgjodhi të martën anëtarin e 8 të Gjykatës Kushtetuese dhe të parin prej tre vendeve që duhet të plotësohen nga Gjykata e Lartë. Në një njoftim për shtyp Gjykata e Lartë bëri me dije se Sandër Beci, i cili më herët ishte anëtar i Këshillit të Lartë të Prokurorisë u zgjodh në vendin e lënë vakant pas shkarkimit nga procesi i vetingut i Fatmir Hoxhës.
“Mbledhja e Posaçme e gjyqtarëve të Gjykatës së Lartë, pasi u njoh me listën e kandidatëve të renditur nga Këshilli i Emërimeve në Drejtësi, në përfundim të procesit të votimit, vendosi të shpall fitues me 7 (shtatë) vota pro, kandidatin Sandër Beci”, thuhet në vendim.
Në garë me Becin ishin 8 kandidatë të tjerë, përfshi kolegun e tij në KLP prokurorin Vatë Staka.
Mbledhja e Posaçme e Gjykatës së Lartë u bë e mundur pas emërimit në fillim të këtij viti të dy anëtarëve të rinj nga Këshilli i Lartë Gjyqësor, që e çoi numrin e anëtarëve në 12. Njoftimi për shtyp i Gjykatës së Lartë nuk bën me dije se si u votuan kandidatët e tjerë.
Mbledhja e Posaçme e Gjykatës së Lartë duhet të zgjedhë edhe dy anëtarë të tjerë të Gjykatës Kushtetuese, përfshi anëtarin që do të zëvendësojë kryetaren aktuale Vitore Tusha. Ndërkohë vetë Gjykata e Lartë ka ende 7 vende vakante që duhet të plotësohen nga Këshilli i Lartë Gjyqësor.
Vakancat në të dy gjykatat u krijuan pas fillimit të procesit të vetingut që solli dorëheqjen dhe shkarkimin e një pjesë të mirë të anëtarëve të tyre. Për një kohë Gjykata Kushtetuese dhe ajo e Lartë mbetën me vetëm një anëtar.
