Pesë punonjëse të një kompanie prodhimi kabllosh elektro-mekanike pranë autostradës Durrës-Tiranë përfunduan në spital me shenja helmimi, sipas një njoftimi që shpërndau të hënën policia e Durrësit.
Punëtoret u paraqitën në spital rreth orës 13:10 pas mesdite dhe sipas mjekes së shërbimit të rojes në Urgjencën e Durrësit, Ermira Kale, shkak i gjendjes së tyre dyshohet se ka qenë dezinfektimi i ambienteve të fasonerisë.
“Simptomat e tyre ishin nauze, ndjesi të vjellash dhe dhimbje koke. Ishin si të këputura”, tha Kale, e specializuar si toksikologe.
“Pas dezinfektimit të ambientit është normale që në ajër të ketë sasi të tilla që mund të thithen, por me rëndësi është që nuk është intokacion kërcënues për jetën,” sqaroi mjekja Kale.
BIRN mësoi se punonjëset punonin për kompaninë “Forschner Albania” me seli në Vaqarr të Tiranës, e profilizuar në prodhimin e sistemeve kabllore, sistemeve elektromekanike dhe import-eksportin e tyre. Ato kanë qëndruar për pak kohë në ambientet e urgjencës dhe më pas janë larguar drejt shtëpive të tyre.
Sipas parashikimeve ligjore, kompanitë kanë detyrimin që të njoftojnë Inspektoratin Shtetëror të Punës dhe Shërbimeve Shoqërore për ngjarje të ngjashme, por një përfaqësues i Inspektoriatit në degën e Durrësit tha se ngjarjen e kishin mësuar nga media.
“Është miratuar autorizimi për hapjen e procedurës [së inspektimit] dhe një grup pune është nisur për në ambientet e kompanisë,” tha ai.
BIRN tentoi të kontaktonte me përfaqësues të kompanisë “Forschner Albania”, por një punonjëse e saj refuzoi të komentonte ngjarjen.
Në Durrës vitet e fundit numërohen disa episdode të helmimit të punonjëseve të fasonerive, kryesisht të sektorit të prodhimit të veshjeve.
