Numri i vdekjeve në Shqipëri vijoi të ishte i lartë gjatë tremujorit të parë të këtij viti në krahasim me mesataren shumëvjeçare të periudhës para pandemisë, por situata duket se është përmirësuar ndjeshëm në krahasim me vitin e kaluar, kur ishte edhe kulmi i pandemisë së koronavirusit të ri. Sipas Institutit të Statistikave, 7,938 shqiptarë humbën jetën në periudhën janar-mars të këtij viti nga 10,222 që vdiqën në të njëjtën periudhë të një viti më parë. Gjithsesi, numri mesatar i vdekjeve për tremujorët e parë të viteve 2016-2020, pra viteve para se të fillonte pandemia, ishte 6414, gjë që sugjeron se vdekjet në tremujorin e parë të këtij viti ishin gjithsesi rreth 1500 mbi mesataren shumëvjeçare.
Pandemia e koronavirusit të ri erdhi në shuarje gjatë muajve të fundit, me një numër të ulët të infektuarish dhe me mortalitet shumë më të ulët se sa më parë. Numri i të sëmurëve aktivë ra nga 24 mijë vetë në fund të janarit, kur u shënua kulmi për këtë vit, në 469 vetë në fund të marsit dhe rreth 200 që është aktualisht.
Gjithsesi, edhe në tremujorin e parë, numri i viktimave të COVID-19 të raportuara nga Ministria e Shëndetësisë, është mbi pesë herë më i ulët se sa vdekjet e shtuara në krahasim me vitet para pandemisë.
Organizata Botërore e Shëndetësisë vlerësoi javën e kaluar se në Shqipëri duhet të kenë vdekur rreth 13 mijë vetë më shumë se sa do të kishin vdekur në rast se nuk do të kishte pandemi. Nga këto, vetëm një e katërta shpjegohen me vdekjet e identifikuara nga autoritetet shëndetësore si të shkaktuara nga COVID-19.
