Deputeti Agron Shehaj deklaroi të martën se ka thirrur në interpelancë kryeministrin Edi Rama në lidhje me shpalljen investitorë strategjikë të familjarëve të ministres Xhaçka si dhe faljen sipas tij të mijëra hektarëve tokë shtetërore për oligarkët.
“Kryeministri Rama duhet të japë llogari para qytetarëve se si me vendimin e qeverisë së datës 2 mars 2022 i dha pronën publike në përdorim në Dhërmi familjes Xhaçka,” tha Shehaj.
Shehaj e quajti ligjin për investimet strategjike si “ligjin e ministrave strategjikë”.
“Deri tani ka prodhuar vetem ministra me hotele dhe resorte dhe asnjë investim strategjik nga kompanitë e njohura të turizmit nderkombëtar,” tha Shehaj.
Sipas deputetit të Partisë Demokratike, kryeministri në interpelancë do të duhet të japë llogari edhe “se si po shkatërrohen Parqet Kombëtare që të ndërtohen resortet e kushërinjve të qeverisë”.
Ligji për “investimet strategjike” ka marrë kritika për favorizimin e një grushti biznesmenësh dhe investimeve të tyre në bregdetin e Shqipërisë. Në një investigim të mëparshëm, BIRN zbuloi se Këshilli i Ministrave i dha në përdorim një plazh në Dhërmi partneres amerikane të vëllait të ministres së Jashtme, Olta Xhaçka, pasi bashkëshorti i saj, Artan Gaçi kishte fituar statusin e investitorit strategjik.
Xhaçka i ka kundërshtuar akuzat dhe ka pohuar se bashkëshorti i saj ‘nuk ka përfituar asnjë cm tokë nga shteti”.
BIRN zbuloi gjithashtu se nga 17 projekte të miratuara nga Komiteti i Investimeve Strategjike gjatë vitit 2021, katër prej tyre ndodhen në zona të mbrojtura ose afër tyre – çka ka shqetësuar ekspertët dhe aktivistët mjedisorë.
