Policia e Durrësit arrestoi një 19 vjeçar i cili po transportonte 4 kallëpe tritol, me peshë të përgjithshme rreth 1 kilogram.
Operacioni policor i koduar “Kulla” sipas emrit të fshatit ku banonte i riu u zhvillua në rrugën që lidh Sukthin me fshatin Kullë, teksa sipas policisë djali po e transportonte lëndën eksplozive me qëllim shitjen.
Policia sqaroi se në bashkëpunim me Prokurorinë Durrës po punohej për zbardhjen e implikimit ose jo në ngjarje kriminale të 19-vjeçarit me iniciale R. K. I riu akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Episodet e trafikimit të lëndëve shpërthyese janë shtuar muajt e fundit në territorin e Durrësit dhe gjithmonë e më shumë po përfshihen të rinjtë. Më 15 mars të këtij viti 3 të rinj u arrestuan në zonën e njohur si Shkëmbi i Kavajës në momentin e transaksionit për shitjen e kapsollave elektrike, një lloj i eksplozivit që për të shpërthyer përdor energjinë elektrike.
Sulmet kërcënuese me eksplozivë kryesisht në makina, janë shqetësim i hershëm në Shqipëri. Atentati i fundit i kësaj natyre ndodhi në Kamëz, ku persona të paidentifikuar hodhën në erë një makinë të martën 31 maj.
