Kongresmeni Colin Allred tha të martën se ai ka prezantuar një rezolutë që kërkon drejtësi për të mbijetuarën e përdhunimit të kohës së luftës Vasfije Krasniqi Goodman dhe bën thirrje që “të gjithë ata që janë përgjegjës për dhunën seksuale gjatë luftës në Kosovë” të hetohen dhe ndiqen penalisht.
“Është e dënueshme që asnjë individ nuk është shpallur fajtor për krimet e tyre seksuale të luftës kundër znj. Krasniqi Goodman”, thuhet në draft-rezolutën e Allred.
“Qeveria e Republikës së Serbisë duhet të ndalojë mbrojtjen dhe lavdërimin e çdo personi që ka qenë i përfshirë në krime lufte gjatë konfliktit të Kosovës dhe duhet ta bëjë prioritet hetimin dhe ndjekjen penale të çdo individi të tillë”, shton ai.
Krasniqi Goodman është një nga viktimat e pakta të dhunës seksuale gjatë luftës në Kosovë që ka folur publikisht se si është përdhunuar nga policët serbë gjatë luftës, kur ajo ishte 16 vjeçe.
Dy ish-policë serbë u liruan nga akuza për përdhunim të saj nga Gjykata Supreme e Kosovës në vitin 2014.
Në vitin 2019, Krasniqi Goodman dëshmoi në Komitetin e Punëve të Jashtme të Dhomës së Përfaqësuesve të SHBA-së se Uashingtoni duhet të bëjë më shumë për ta mbajtur Serbinë përgjegjëse për krimet e kohës së luftës, përfshirë përdhunimin.
“Jam krenare që kongresmeni Colin Allred prezantoi sot në Kongresin Amerikan një rezolutë për drejtësi në rastin tim dhe në rastin e më shumë se 20,000 të mbijetuarve të përdhunimit të kohës së luftës… rrugëtimi ynë për drejtësi vazhdon”, shkroi Krasniqi Goodman të martën në një postim në Facebook.
Krasniqi Goodman, e cila ka nënshtetësi amerikane, tani mban një vend në parlamentin e Kosovës pasi u zgjodh vitin e kaluar, duke përfaqësuar partinë qeverisëse Vetëvendosje.
Draft-rezoluta e Allred thotë se progresi në zgjidhjen e rastit të Krasniqi Goodman dhe atyre që përfshijnë të mbijetuar të tjerë të dhunës seksuale gjatë luftës në Kosovë “duhet të mbetet një prioritet i rëndësishëm bilateral midis Shteteve të Bashkuara dhe Qeverisë së Republikës së Serbisë”.
“Jam shumë i frymëzuar nga guximi i Vasifjes për të ndarë historinë e saj të dhimbshme së saj pikëlluese dhe për të hedhur dritë mbi realitetin e dhunës seksuale të kryer nga ushtria dhe policia serbe gjatë luftës së Kosovës,” tha zoti Allred.
“Njoftimet për dhunën seksuale që ndodhin në Ukrainë janë një kujtesë e qartë se nuk duhet t’i harrojmë tragjeditë e së kaluarës dhe të hedhim dritë mbi historitë e të mbijetuarve që të mund të punojmë për identifikimin e përgjegjësisë dhe të sigurohemi që kjo të mos ndodhë më kurrë. Kjo është arsyeja pse kjo rezolutë është kaq e rëndësishme dhe pres me padurim të punoj që ajo të mbështetet dhe miratohet nga e gjithë Dhoma e Përfaqësuesve”, shtoi ai.
